Хитой—Қирғизистон—Ўзбекистон мултимодал транспорт йўлаги орқали юк поезди ҳаракати йўлга қўйилди, деб хабар бермоқда Транспорт вазирлиги матбуот хизмати.
Қайд этилишича, Сиан шаҳрида бўлиб ўтган Марказий Осиё—Хитой саммити доирасида эришилган келишувларни амалга ошириш мақсадида Zhejiang Union of Railway Logistics компанияси, “Ўзбекистон темир йўллари” АЖ ва “Қирғиз темир йўли” миллий компанияси давлат корхонаси ҳамкорлигида Ланджоу станциясидан Тошкентга 30 та контейнердан иборат блок поезди ҳаракати йўлга қўйилди.
Хитой—Қирғизистон—Ўзбекистон мултимодал транспорт йўлаги бўйлаб юк ташишни рағбатлантириш мақсадида илк синов поезди ҳаракатига 9 июнь куни старт берилди.
Таркибида қуёш панеллари, механик жиҳозлар, матолар ва бошқа юклар бўлган умумий қиймати 2,5 миллион АҚШ долларини ташкил этувчи юк поезди Хитойнинг Ланджоу шаҳридан Тошкентга 15 кунда етиб келиши белгиланган.
Хитой—Қирғизистон–—Ўзбекистон темир йўли қурилиши лойиҳаси бўйича 2022 йил сентябрь ойида Самарқандда бўлиб ўтган ШҲТ саммити доирасида уч давлат вакиллари томонидан келишилган эди. 2023 йилнинг 29 апрелида темир йўл лойиҳасининг техник-иқтисодий асослари тайёрлиги маълум бўлган. 19 майда эса темир йўл қурилиши бўйича уч томонлама ҳужжат имзоланди.
Шавкат Мирзиёев 19 май куни Сиан шаҳрида бўлиб ўтган Марказий Осиё—Хитой биринчи саммитида “Хитойни минтақамиз билан боғлайдиган, Европа, Яқин Шарқ ва Африкага олиб чиқадиган хавфсиз ва энг қисқа транспорт йўлакларини ривожлантириш стратегик аҳамиятга эга. Буюк Ипак йўлини қайта тиклашда Транс-Евросиё магистрали лойиҳаси устувор аҳамиятга эга бўлиб, ‘Хитой—Қирғизистон—Ўзбекистон’ автомобиль ва темир йўллари эса унинг муҳим таркибий қисми бўлади”, — деб айтганди.
Изоҳ (0)