Хитойнинг Ланжоу станциясидан 5 июль куни Хитой—Қирғизистон—Ўзбекистон—Афғонистон мултимодал йўналиш бўйича контейнер блок-поездининг жўнаш маросими бўлиб ўтди, деб хабар бермоқда “Ўзтемирйўлконтейнер” матбуот хизмати.
Ушбу контейнер блок-поезди 30 дона 40 футлик контейнерлардан иборат бўлиб, у автомобиль эҳтиёт қисмлари, мебел, канцелярия буюмлари, машина ва ускуналардан иборат. Умумий маршрутнинг узунлиги 6500 километрдан ортиқ ва юкнинг умумий оғирлиги 700 тоннадан ошади. Ташув вақти 16—18 кунни ташкил этиши кутилмоқда.
Ушбу поезд New Land-Sea Corridor Operation Co., Ltd., JST Logistics Corporation Limited, Zhejiang Union of Railway Logistics вa China Railway Container Transport Co., Ltd. компаниялари, шунингдек, “Ўзбекистон темир йўллари” АЖ, “Қирғизистон темир йўллари МК” ДК ва Афғонистон темир йўл бошқармаси Afghanistan Railway Authority томонидан ташкил этилди.
Мултимодал коридор бўйлаб ташиш Ланжоу станциясидан Қашқар станциясигача (Хитой) темирйўл орқали амалга оширилади. Кейин юк автомобиль йўли орқали Ўш темирйўл станциясига (Қирғизистон) етказилади. Ўш станциясидан Хайратон станциясига яна темирйўл орқали етказиб берилади.
Хитой—Қирғизистон—Ўзбекистон мултимодал транспорт йўлаги бўйлаб юк ташишни рағбатлантириш мақсадида илк синов поезди ҳаракатига 9 июнь куни старт берилганди.
4 июль куни Лангфан–Қашқар–Иркештoм–Ўш–Тошкент янги мултимодал йўналишида контейнерли блок-поездини жўнатиш маросими бўлиб ўтганди. Унда 40 та вагонда қурилиш материаллари ортилган бўлиб, умумий оғирлиги 1000 тоннадан ошади.
Изоҳ (0)