АҚШда коронавирусга қарши вакциналар нархи кескин ошди. АҚШ Касалликларни назорат қилиш ва олдини олиш марказлари (CDC) Pfizer ва Moderna вакциналарининг икки дозаси учун 80 доллардан кўпроқ тўламоқда. Бу ҳақда Newsweek хабар берди.
Қайд этилишича, 2020 йилнинг ёзида CDC Pfizer вакцинасини бир дозаси учун 19,50 доллар, Moderna вакцинасини эса 15,25 долларга сотиб олган. Ўшанда CDC ҳар иккала вакцинадан 100 миллион дозадан харид қилган.
2022 йил ёзида CDC Moderna вакцинасининг 66 миллион дозасини ҳар бир доза учун 26,36 долларга ва Pfizer вакцинасининг 105 миллион дозасини 30,48 долларга сотиб олди. Ҳозир улар яна қимматлашди.
Нашрнинг таъкидлашича, ёзда Соғлиқни сақлаш ва аҳолига хизмат кўрсатиш бўйича котиб Ксаве Бесерра Moderna ва Pfizer компанияларига мактуб йўллаб, дорини “мақбул нархда” баҳолашни сўраган.
Шу билан бирга, Moderna ўзининг COVID-19 вакцинаси нархини ҳар бир доза учун 110-130 долларгача оширишни кўриб чиқаётгани хабар қилинган.
Бундан олдин Байден маъмурияти энди коронавирусга қарши вакциналарни сотиб олиш учун федерал маблағлар ишлатилмаслигини айтди. Улар тижорат асосида сотиб олинади.
Эслатиб ўтамиз, 5 май куни Жаҳон соғлиқни сақлаш ташкилоти COVID-19 пандемияси тугаганини эълон қилди.
Изоҳ (0)