Қорабоғда 19—20 сентябрь кунлари ўтказилган “маҳаллий аксилтеррор тадбирлари” давомида 192 нафар озарбайжонлик аскар ҳалок бўлди.
Озарбайжон Соғлиқни сақлаш вазирлиги маълумотларига кўра, қурбонларнинг 180 нафари Мудофаа вазирлиги ҳарбий хизматчилари, 12 нафари эса Ички ишлар вазирлиги ходимларидир. Бундан ташқари, хабарда айтилишича, бир фуқаро ҳам ҳалок бўлган.
ССВ баёнотига кўра, 511 нафар ҳарбий хизматчи ва бир фуқаро жароҳатланган.
Қорабоғдаги аксилтеррор операцияси
19 сентябрь куни Озарбайжон “конституциявий тузумни тиклаш” мақсадида Қорабоғда маҳаллий аксилтеррор тадбирларини эълон қилди ва тан олинмаган республика ҳудудини ўққа тута бошлади. Бу арман томонининг провокациялари, жумладан, Аҳмадбейли—Фузули—Шуша трассасида автомобиль портлаши оқибатида озарбайжонлик полиция ходимларининг ҳалок бўлиши билан изоҳланган.
20 сентябрда ўт очишни тўхтатиш бўйича келишувга эришилди – унинг шартларидан бири Қорабоғ армиясини қуролсизлантириш ва арман ҳарбийларини тан олинмаган республикадан олиб чиқиб кетиш эди.
Россия Мудофаа вазирлиги 20 сентябрь куни Қорабоғда россиялик тинчликпарвар кучлар ҳалок бўлгани ҳақида хабар берди. Улар орасида тинчликпарвар контингент қўмондони ўринбосари Иван Ковган ҳам бор. Озарбайжон президенти Илҳом Алиев Владимир Путин билан суҳбатда содир бўлган воқеа учун узр сўради.
Изоҳ (0)