Франция президенти Эммануэл Макрон Франциянинг Нигердаги элчиси дипломатик миссия биносида виртуал гаровда яшаётгани ва мамлакатда ҳокимиятни эгаллаб олган ҳарбийлар элчихонага озиқ-овқат олиб киришга рухсат бермаётганини айтди, деб ёзмоқда BBC.
Элчи Силвен Итте ва элчихона ходимлари “бевосита гаровга олинган” ва армия рационини истеъмол қилишга мажбур бўлмоқда, деди Макрон журналистларга.
26 июль куни президент Муҳаммад Базумни ҳокимиятдан ағдарган Нигер ҳарбий хунтаси Франция элчисига 48 соат ичида мамлакатни тарк этиши кераклигини айтди. Аммо Париж хунта талабларига бўйсунишдан ва янги тузумнинг қонунийлигини тан олишдан бош тортди.
Макроннинг сўзларига кўра, элчи “ташқарига чиқа олмайди, у персона нон грата деб эълон қилинга ва унга овқат берилмаяпти”.
Франция президенти бир неча ҳафтадан бери Нигердаги элчини чақириб олишдан бош тортмоқда. У хунтанинг талабларини провокацион деб ҳисоблайди.
Журналистларнинг элчи ватанига эвакуация қилинадими, деган саволига Макрон президент Базум билан келишилган чоралар кўрилишини, чунки у мамлакатдаги ягона қонуний ҳокимият эгаси эканини айтди.
Изоҳ (0)