Ғарбий Африка мамлакатлари Иқтисодий ҳамжамияти (ECOWAS) қўмондонлари Нигердаги давлат тўнтариши туфайли мамлакатга эҳтимолий бостириб кириш санасини келишиб олди. Бу ҳақда 18 август куни Reuters хабар берди.
Қайд этилишича, бундай қарор Гана пойтахти Аккрида икки кунлик учрашувлар якунида қабул қилинган.
ECOWAS йиғилишида Нигерда демократияни тиклаш учун эҳтимолий аралашув муҳокама қилинган. Аккра шаҳрида бўлиб ўтган йиғилиш иштирокчиларидан бири агар дипломатик саъй-ҳаракатлар натижа бермаса, қуролли куч ишлатиш талаб қилиниши мумкинлигини айтди. Аммо келишилган ҳужум санасини ошкор қилмади.
Ўз навбатида, ECOWAS’нинг сиёсий масалалар ва хавфсизлик бўйича департаменти раҳбари Абдул-Фату Муссо аралашиш буйруғини зудлик билан бажаришга тайёрлигини таъкидлади. Иттифоқчи давлатлар саммитида эҳтимолий операция режалари ва шароитлари батафсил муҳокама қилинган, бироқ Нигер ҳукумати билан тинчлик келишувига эришиш учун ҳали ҳам умид борлиги таъкидланган, чунки “музокаралар учун эшиклар очиқлигича қолмоқда”.
Эслатиб ўтамиз, 26 июль куни Нигер президенти Муҳаммад Базум ўз қўриқчилари томонидан ҳибсга олинди ва ҳокимиятдан четлаштирилди.
Армия генерали Абдураҳмон Тчиани мамлакатнинг янги раҳбари деб эълон қилинди.
Изоҳ (0)