Хитойда суд ХХР собиқ адлия вазири, жамоат хавфсизлиги вазири собиқ ўринбосари Фу Чженхуани икки йил муҳлат билан ўлим жазосига ҳукм қилди. Бу ҳақда National Business Daily газетаси хабар бермоқда. Фу Чженхуа Пекин Жамоат хавфсизлиги бошқармаси бошлиғи бўлган, кейин 2013 йилдан 2018 йилгача жамоат хавфсизлиги вазири ўринбосари бўлиб ишлаган. 2018 йилда эса у адлия вазири этиб тайинланган ва шу лавозимда 2020 йилгача қолган.
Тергов маълумотларига кўра, собиқ мансабдор 2005—2021 йиллар давомида ўз хизмат ваколатларини суиистеъмол қилиб, поралар олган ва алоҳида шахсларга бизнес юритишда ҳомийлик қилган. Суд аниқлашича, собиқ амалдор жами 117 миллион юань (қарийб 16,5 миллион доллар) миқдорида поралар олган. Бундан ташқари, у «ўз укаси Фу Вейхуанинг эҳтимолий оғир жиноятлари далилларини яширган», дейилади хабарда.
Фу Чженхуанинг ўзи айбига иқрор бўлди. Суд уни икки йиллик муҳлат билан ўлим жазосига маҳкум қилди. Агар шу икки йил ичида маҳкум қасддан бошқа жиноят содир этмаса, муҳлат тугаганидан кейин ўлим жазоси умрбод қамоқ жазосига, айрим ҳолларда эса 15—20 йиллик муддатга ўзгартирилиши мумкин.
«РИА Новости» қайд этишича, сўнгги бир неча йиллар ичида бир йўла бир нечта жамоат хавфсизлиги вазири ўринбосарлари коррупциявий жиноятлар туфайли суд таъқибига учраган. Чунончи, Ли Дуншен 15 йилга озодликдан маҳрум этилган, «Интерпол» собиқ раҳбари Мен Хунвей 13,5 йилга қамалган, Сун Лицзюн эса ўз иши бўйича қарорни кутмоқда.
Изоҳ (0)