Хитой Ташқи ишлар вазирлиги матбуот котиби Мао Нин Пекинда бўлиб ўтган брифингда мамлакат ташқи ишлар вазири Цин Ганнинг узоқ вақт давомида жамоатчиликка кўриниш бермаётгани ҳақидаги саволга жавоб берди, деб ёзади “РИА Новости”.
“Менда сизларга бера оладиган ҳеч қандай маълумот йўқ”, — деди у Цин Гань қаердалиги ҳақида хабар борми, деган саволга жавобан.
ХХР ташқи ишлар вазири Цин Гань бир ойдан бери омма олдида кўриниш бермади, бу эса оммавий ахборот воситаларида кўплаб миш-мишларга сабаб бўлмоқда.
Аввалроқ Bloomberg агентлиги манбаларга таяниб, Буюк Британия ташқи ишлар вазири Жеймс Клеверли Пекинга сафарини қолдиргани, бунга Хитой ташқи ишлар вазирининг ғойиб бўлиши сабаб бўлгани ҳақида хабар берганди.
Оқ уй Хитой ташқи ишлар вазирининг йўқолиши ҳақидаги хабарларга муносабат билдириб, АҚШ расмийларида унинг ғойиб бўлиши сабаблари ҳақида маълумот йўқлигини билдирган.
Цин Гань 11–15 июль кунлари Жакартада бўлиб ўтган Жануби-Шарқий Осиё давлатлари ассоциацияси (ASEAN) ташқи ишлар вазирларининг йиллик йиғилишида ҳам қатнашмаган, унинг ўрнига Индонезияга Хитой коммунистик партияси Марказий қўмитаси ташқи ишлар комиссияси департаменти раҳбари Ван И кетган. Хитой ТИВ расмий вакилининг сўзларига кўра, Цин Гань “соғлиғи сабаб” Жакартадаги учрашувини ўтказиб юборган.
Изоҳ (0)