Кремль “Вагнер” асосчиси Евгений Пригожиннинг ўлими бўйича тергов секин кетаётганини рад этди. Бу ҳақда Россия президенти матбуот котиби Дмитрий Песков журналистларга маълум қилди.
“Бу мураккаб тергов, мураккаб воқеа. Тергов давом этмоқда, шунинг учун қандайдир изоҳ беришга ҳали эрта”, — деди Песков.
23 август куни кечқурун Евгений Пригожиннинг самолёти Тверь вилоятида қулаб тушди, бортдаги барча 10 киши ҳалок бўлди. Росавиация хабарига кўра, бортда бошқалар қаторида Пригожиннинг ўзи ва “Вагнер” қўмондони Дмитрий Уткин ҳам бўлган.
Тергов қўмитаси ҳаво транспортидан фойдаланиш қоидаларини бузганлик (Россия Федерацияси Жиноят кодексининг 263-моддаси) бўйича жиноий иш қўзғатган. Пригожиннинг ўлими Росия Тергов қўмитаси томонидан 27 август куни тасдиқланган. Самолёт ҳалокати сабаблари ҳақида расман хабар берилмаган.
Норасмий версиялар орасида энг кенг тарқалгани бортдаги портлашдир. Ғарб оммавий ахборот воситаларининг хабарларига кўра, Пригожиннинг бизнес самолётига бомба ўрнатилган ва буйруқ шахсан Владимир Путин томонидан берилган бўлиши мумкин, деб тахмин қилинади. Кремль бу версияни “мутлақ ёлғон” деб атаган. Шу билан бирга, Песков авиаҳалокатнинг асосий версияларидан бири “қасддан жиноят” деб баҳоланишини айтган.
Пригожиннинг дафн маросими ҳарбий эҳтиромларсиз ўтди
23 август куни авиаҳалокатда вафот этган “Вагнер” асосчисининг дафн маросими 29 август куни Санкт-Петербургдаги Порохов қабристонида бўлиб ўтди. Маросим ёпиқ форматда ўтказилди.
“Вагнер” ёлланма аскарлари ва Пригожиннинг бошқа тарафдорлари дафн маросимига таклиф қилинмаган — ОАВ хабарларига кўра, маросимда фақат унинг яқинлари иштирок этган. “Вагнер” ХҲК раҳбарини дафн этиш пайтида ҳарбий одатларга ҳам риоя қилинмаган, аслида эса, президент фармонига кўра, Россия Қаҳрамони унвонига эга бўлган одамларнинг дафн маросими тегишли жараёнлар билан ўтиши керак.
Авиаҳалокат “Вагнер” исёнидан икки ой ўтиб юз берди
Евгений Пригожинга тегишли бизнес-жет Москвадан Санкт-Петербургга кетаётганда Тверь вилоятида ҳалокатга учради. Самолёт бортида уч нафар экипаж аъзоси ва етти нафар йўловчи, жумладан Пригожиннинг ўзи ва ХҲК асосчиларидан бири Дмитрий Уткин бўлган.
Оммавий ахборот воситаларида самолёт қулаши сабабларининг версиялари орасида бортда бомба портлаши ва зенит-ракета билан уриб туширилиши бор.
Аксарият сиёсий таҳлилчилар Россияда воқеадан роппа-роса икки ой олдин ҳарбий исён уюштирган Пригожиннинг ўлимига махсус хизматлар алоқадор деб ҳисоблаяпти.
Изоҳ (0)