Тошкентнинг Мирзо Улуғбек туманида амалга оширилаётган қурилиш майдонида 6 туп мевали ва 4 туп манзарали — жами 10 туп дарахт ўсишдан тўхтайдиган даражада шикастлантирилгани аниқланди. Бу ҳақда Тошкент шаҳар Экология бошқармаси хабар берди.
Маълум қилинишича, 2023 йилнинг февралида Тошкент шаҳар Экология, атроф-муҳитни муҳофаза қилиш ва иқлим ўзгариши бошқармасининг туман бўлими ходимлари Ascendant Group компанияси томонидан Шаҳриобод кўчасида амалга оширилаётган қурилиш майдонидаги 30 туп дарахтни хатловдан ўтказган.
Компания дарахт ва буталарга шикаст етказиш, дарахтларнинг қуриб қолишига шароит яратиш ёки қуриб қолиши учун кимёвий моддаларни тўкиш ҳамда дарахтларни ноқонуний кесилиши қонунда белгиланган тартибда жавобгарликка сабаб бўлиши мумкинлиги тўғрисида огоҳлантирилганига қарамасдан, қурилиш ишларини олиб боришда қонун бузилиши ҳолатига йўл қўйган.
“Ҳудуддаги 3 туп ўрик, 2 туп гилос, 1 туп хурмо дарахтлари ҳамда 3 туп чинор, 1 туп шумтол дарахтлари ўсишдан тўхтайдиган даражада шикаслантирилган” — дейилади хабарда.
Айни пайтда, тўпланган ҳужжатлар ҳуқуқий баҳо берилиши мақсадида, прокуратура органларига тақдим этилган. Зарар миқдори ҳисобланганида 248 миллион 94 минг сўмни ташкил этган.
Изоҳ (0)