Экология, атроф-муҳитни муҳофаза қилиш ва иқлим ўзгариши вазири маслаҳатчиси Расул Кушербаев ўзининг Telegram каналига пойтахтнинг Олмазор туманида дарахтлар дрель ёрдамида тешилиб, қуритилаётгани айтилган видеони жойлаштирди.
Видеодаги ҳолат туманнинг “Чилтўғон” (“Тахтапул”) маҳалласи ҳудудидаги собиқ Собир Раҳимов боғи ўрнидаги дарахтзорда содир бўлган.
“Тадбиркор қурилиш қилмоқчи бўлган. Бироқ маҳалла аҳли ва экологлар бу ердаги яшнаб турган дарахтларнинг кесилишига қарши. Кесишнинг имкони бўлмагач, атроф ўралиб, кўздан пана ҳолда дарахтларнинг туби тешилиб, дарахтни қуритадиган суюқликлар қуйилган. Буни дарахтларга қарши суиқасд дейиш мумкин.
Афсуски, қурилиш ва пул дарди баъзи ‘тадбиркор’ларни келажакни завол қилишдан ҳам қайтармаяпти. Шу даражага етиб келдикми?” — деб ёзади у.
Бош прокуратура матбуот котиби Ҳаёт Шамсутдиновнинг “Дарё”га маълум қилишича, дарахтларни дрель ёрдамида тешиб, қуритганларга нисбатан Жиноят кодексининг 198-модда (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) 3-қисми билан жиноят иши қўзғатилган. Кушербаевга кўра, дарахтларнинг қуритилиши натижасида табиатга етказилган зарар миқдори 534 миллион сўмни ташкил этмоқда.
Қайд этилишича, ҳозирда тергов ҳаракатлари олиб борилмоқда.
Ноқонуний дарахт кесиш ҳолатлари
Бир неча кун олдин Хоразмда ўзини тадбиркор деб таништирган шахслар истироҳат боғидаги дарахтларни кесиб ташлаганди. Бухорода 22 туп қарағай ноқонуний кесилиб, табиатга 144,3 миллион сўмлик зиён етказилганди. Фарғонадаги чегара пости яқинида 12 туп манзарали дарахт қўпориб ташлангани хабар қилинганди.
Изоҳ (0)