Фармацевтика тармоғини ривожлантириш агентлиги яна Соғлиқни сақлаш вазирлиги тузилмасига ўтказилади. Бу ҳақда Соғлиқни сақлаш вазирлиги фаолиятини янада такомиллаштириш чора-тадбирлари тўғрисидаги президент фармонида белгиланди.
6 сентябрь куни имзоланган фармонга кўра, агентлик Соғлиқни сақлаш вазирлиги тузилмасига мустақил юридик шахс мақоми ҳамда фаолиятини молиялаштиришнинг амалдаги манбалари ва тартибини сақлаб қолган ҳолда ўтказилади. Фармацевтика тармоғини ривожлантириш агентлиги фармацевтика саноати барқарор ривожланиши учун жавобгарликни тўлиқ зиммасига олади.
2017 йилнинг июлида “Ўзфармсаноат” концерни тугатилиб, унинг ўрнига Соғлиқни сақлаш вазирлиги ҳузурида Фармацевтика тармоғини ривожлантириш агентлиги ташкил этилганди.
2022 йил декабрда президент фармони билан агентлик Инвестициялар, саноат ва савдо вазирлигига ўтказилганди (дори воситалари ва тиббиёт буюмларини рўйхатдан ўтказиш функцияси Соғлиқни сақлаш вазирлигида қолди).
Изоҳ (0)