Сурияда халқаро террорчилик ташкилотини тузган ўзбекистонлик эркак ҳалок бўлди

Тошкент шаҳар ИИББ 6 сентябрь куни Суриядаги террорчилар сафида жанг қилган ўзбекистонлик эркак вафот этганига оид видеони эълон қилди.

Қайд этилишича, Улуғбек Бобомуродов исмли ушбу шахс 1972 йилда туғилган, Тошкентнинг Юнусобод туманида вақтинчалик рўйхатда турган. 2009—2010 йилларда у Сурхондарё вилоятининг Термиз шаҳрида “Жиҳодчилар жамоати”ни ташкил қилган.

2011 йилда “жамоат” аъзоларининг кўпчилиги ҳуқуқ-тартибот идоралари томонидан қўлга олинганидан сўнг, унинг бошқа аъзоларига нисбатан ҳам қидирув эълон қилинган. Бу вақтда Россияда бўлган “Термиз жамоати” аъзолари Туркияга қочиб ўтган.

2013 йилда Улуғбек Бобомуродов Сурияда “Катибат ул имом ал-Бухорий” халқаро террорчилик ташкилотини ташкил қилган, ўша йили унга нисбатан Жиноят кодексининг 244-2-моддаси (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) билан жиноят иши қўзғатилиб, қидирув эълон қилинган.

Идора маълумотларига кўра, Улуғбек Бобомуродов Сурияда жанговар ҳаракатлар чоғида вафот этган.

Август ўрталарида ўзбекистонлик 22 ёшли йигит Суриядаги террорчилик ташкилотига қўшилиб, жанговар ҳаракатларда қатнашиб келаётгани аниқланганди. Шунингдек, Фарғона вилоятида туғилган 29 ёшли шахс Жанубий Корея давлатига бориб, у ерда “Имом ал-Бухорий катибаси” террорчилик ташкилоти етакчилари билан алоқа ўрнатиб, уларнинг ноқонуний фаолиятини молиялаштириб келгани тўғрисида хабар берилган эди.