Қозоғистон парламенти Мажлиси йиғилишида “Қозоғистон ҳукумати ва Ўзбекистон ҳукумати ўртасида Қозоғистон—Ўзбекистон божхона чегараси орқали энергия ресурсларини қувур йўли транспорти ва электр линияси орқали ўтказиш жараёнида қўшма божхона назорати тўғрисида”ги битимни ратификация қилиш ҳақида”ги қонун лойиҳаси кўриб чиқилди.
Мазкур битим 2021 йил 6 декабрь куни Остона шаҳрида имзоланган.
Битимнинг мақсади — Қозоғистон—Ўзбекистон божхона чегараси орқали қувур йўли транспорти ва электр узатиш линиялари орқали олиб ўтиладиган энергия ресурсларини назорат қилиш самарадорлигини оширишдан иборат.
Мамлакат бош вазири ўринбосари — молия вазири Ерулан Жамаубаевнинг қайд этилишича, ушбу ҳужжат икки давлатнинг божхона чегараси орқали қувур йўли транспорти ва электр узатиш линиялари орқали олиб ўтиладиган энергия ресурсларини биргаликда божхона назоратини ташкил этишни назарда тутади.
Унинг сўзларига кўра, келишув энергия ресурсларини божхона декларацияси ва божхона назорати бўйича тажриба, божхона иши соҳасидаги давлатларнинг миллий қонунчилиги талаблари бузилиши тўғрисидаги маълумотлар билан алмашишни кўзда тутади.
“Мазкур битимни ратификация қилиш мамлакат учун салбий ижтимоий, иқтисодий ва ҳуқуқий оқибатларга олиб келмайди ва республика бюджетидан қўшимча маблағ ажратишни талаб қилмайди”, — деган вазир.
Август охирларида Ўзбекистон ва Туркманистон газ етказиб бериш бўйича янги битимни имзолашга келишиб олганди. Шунингдек, Ўзбекистонда саккиз ойда 390 миллиард сўмлик газ ва электрдан ноқонуний фойдаланиш ҳолатлари аниқлангани тўғрисида хабар берилганди.
Изоҳ (0)