Арманистон Мудофаа вазирлиги 11—20 сентябрь кунлари мамлакатда Арманистон—Америка ҳарбий машғулотлари ўтказилишини маълум қилди.
Машқлар Арманистон Мудофаа вазирлиги тинчликпарвар бригадасининг “Зар” ўқув маркази базасида халқаро тинчликпарвар миссияларда иштирок этишга тайёргарлик доирасида амалга оширилади. Хабарда айтилишича, машғулотлар тинчликпарварлик вазифаларини бажаришда “барқарорлаштириш операциялари”ни ўз ичига олади.
Арманистон Мудофаа вазирлиги машғулотлар мақсадини “тинчликпарварлик операциялари доирасида халқаро тинчликпарвар миссияларда иштирок этувчи бўлинмалар ўртасидаги ўзаро ҳамкорлик даражасини ошириш, шунингдек, бошқарув ва тактик алоқада илғор тажриба алмашиш” деб атади.
Ҳисоботда қайд этилишича, тинчликпарвар миссияларга жалб қилинган бўлинмалар “ҳамкор мамлакатларда ўтказиладиган шу каби қўшма машғулотларда мунтазам равишда қатнашади”.
Пашинян КХШТ ҳарбий машғулотларини рад этганди
2023 йил январида бош вазир Никол Пашинян бу йилги Коллектив Хавфсизлик Шартномаси Ташкилотининг ўқув машғулотларини Арманистонда ўтказишдан бош тортганди. Кейинчалик у Ереванда КХШТ “Арманистонни тарк этаётгани” ҳақида таассурот борлигини айтди. Пашинян Арманистон КХШТга аъзоликни тугатиш ёки музлатиш тўғрисида қарор қабул қилиши мумкинлигини истисно қилмади.
Пашинян Италиянинг La Repubblicа газетасига берган интервьюсида Арманистоннинг хавфсизлик борасида Россияга қарамлиги стратегик хато эканини айтган.
Изоҳ (0)