Украина ҳаво базаларидан бирига Ми-8 вертолётини қўндирган россиялик учувчи Максим Кузминов 500 минг доллар мукофот олади, деб ёзмоқда “Украинская правда” Украина Мудофаа вазирлиги разведка бошқармаси (ГУР) вакили Андрей Юсовга таяниб.
“Расмий қонунчилик бор, тегишли қонун Украина президенти томонидан 2022 йил апрель ойида имзоланган, унда Украина томонига техника билан ўтган шахсга тегишли компенсация тўланиши белгиланган”, — деди Юсов.
У Россия ҳарбийларини Кузминовдан ўрнак олишга чақирди.
“Украина демократик ҳуқуқий давлат, биз ўз мажбуриятларимизни бажарамиз ва халқаро ҳуқуққа риоя қиламиз. Шунинг учун, уруш жиноятчиси бўлишни истамайдиган россияликлар, илтимос, таслим бўлинг, Украина томонига ўтинг ва ўз шаънингиз, виждонингизни ҳимоя қилинг, Путин режимига қарши курашинг”, — дея қўшимча қилди ГУР вакили.
Россиялик учувчининг таслим бўлиши
Россиянинг Ми-8 вертолёти Украинанинг Харьков вилоятидаги авиабазасига қўнгани ҳақида 23 август куни маълум бўлди. Ўшанда Россия Мудофаа вазирлигига яқин бўлган Fighterbomber Telegram канали вертолёт экипажи “қандайдир сабаб билан йўналишни йўқотиб” фронт чизиғини кесиб ўтгани ва тасодифан Украина аэродромига қўнгани ҳақида ёзди.
Украина Мудофаа вазирлигининг Бош разведка бошқармаси хабар беришича, вертолёт қўниши Украина ҳарбийларининг “Синици” кодли махсус операцияси назоратида амалга оширилган. Вертолётни бошқараётган учувчи Максим Кузминов ўзи ҳаракатларини Россиянинг Украинага бостириб киришига қарши экани ва урушда қатнашишни истамаслиги билан изоҳлади. Кейинчалик у экипажнинг яна икки аъзоси йўқ қилинган бўлиши мумкинлигини айтди. Кузминовнинг сўзларига кўра, у ҳамкасбларини таслим бўлишга кўндирмоқчи бўлган, бироқ улар қўрқиб, вертолёт қўнганидан кейин қочишга уринган.
Изоҳ (0)