Арманистон Беларусда Коллектив хавфсизлик шартномаси ташкилоти раҳбарлигида сентябрь ойида бўлиб ўтадиган “Скала—2023” машғулотларида қатнашишдан бош тортди. Бу ҳақда Арманистон ички ишлар вазирлигига таяниб, Россия матбуоти хабар берди.
Қайд этилишича, бундай қарорга Арманистон “Ички ишлар вазирлиги қутқарув хизмати зиммасида касбий юклама кўплиги” сабаб бўлган.
Беларусдаги машғулотлар мавзуси ядровий объектда авария юз берган тақдирда унинг оқибатларини бартараф этиш бўлиши айтилмоқда.
“Умид қиламанки, ҳеч қачон буни амалда қўллашга тўғри келмайди, лекин тинчликни хоҳласангиз, урушга тайёрланишингиз керак. Бошқача айтганда, агар фавқулодда вазиятни муваффақиятли бартараф этишни истасангиз, уни бартараф этишга тайёр бўлинг”, — деди Беларусь Фавқулодда вазиятлар вазирлиги раҳбари Вадим Синявский.
Йил бошида Арманистон КХШТнинг 2023 йилги ўқув машғулотларини ўз ҳудудида ўтказишдан бош тортган эди.
Арманистон ва КХШТ муносабатлари совуқлашган
Маълумот учун Арманистон ва КХШТ ўртасидаги муносабатлар 2020 йилда Тоғли Қорабоғ учун кураш бошланганидан сўнг, КХШТ Ереванга сезиларли амалий ёрдам кўрсатмагани ортидан совуқлашган.
Июнь ойи бошида Арманистон Хавфсизлик кенгаши котиби Армен Григорян Ереваннинг КХШТга аъзолиги мамлакат учун “маълум муаммолар” туғдираётганини айтди. Хусусан, бу Арманистонга Ғарб давлатларидан ҳарбий ёрдам олиш имкониятига таъсир қилмоқда, деб таъкидлади расмий.
КХШТ Арманистонга қандай наф келтиряпти, деган саволга жавоб берар экан, Григорян 2020 йилдан бери бирор ёрдам кўрсатилганига мисол топиш қийинлигини таъкидлади.
Аввалроқ Арманистон бош вазири Никол Пашинян мамлакат Украинадаги урушда на Россиянинг, на Ғарбнинг иттифоқчиси эканини маълум қилди.
Изоҳ (0)