Донецк вилояти ҳарбий-фуқаролик маъмурияти раҳбари Павель Кириленко ишдан бўшатилди. Украина президенти Владимир Зеленскийнинг тегишли фармони давлат раҳбари сайтида эълон қилинди.
5 сентябрдаги фармонда айтилишича, Кириленко ўз аризаси туфайли ишдан олинган. Кириленко бу лавозимда 2019 йилдан бери ишлаб келаётганди.
Президент фармонида истеъфо сабаби кўрсатилмаган. Бироқ аввалроқ “Халқ хизматчиси” фракцияси раҳбари Девид Арахамия Кириленко Монополияга қарши кураш қўмитасига раҳбарлик қилиши мумкинлигини айтганди. Қўмитанинг аввалги раҳбари Олга Пишанская истеъфога чиқиш тўғрисида ариза ёзган, у Давлат мулк жамғармасига раҳбарлик қилиши мумкин, дея хабар берди Украинанинг New Voice нашри.
Бунга қадар Олий Рада Зеленскийнинг Украина Мудофаа вазирлиги раҳбари Алексий Резниковни истеъфога чиқариш ҳақидаги таклифини қўллаб-қувватлаган эди. Резниковни парламентда олқишлар билан кузатишди.
Мудофаа вазирлигига мамлакат Давлат мулки жамғармасининг собиқ раҳбари Рустем Умеров раҳбарлик қилади.
Умеров ҳақида
Вазирликка Умеровнинг номзодини Зеленский илгари сурди. Унинг ўзи аллақачон Украина Давлат мулки жамғармаси раҳбари лавозимидан истеъфога чиқиш ҳақида ариза берган. Олий Рада уни навбатдаги ялпи мажлисда кўриб чиқади. Умеров — келиб чиқиши қрим-татар украиналик тадбиркор. Унинг оиласи 1944 йилда Қримдан Марказий Осиёга кўчириб юборилган. Умеров 1982 йил Самарқанд вилоятининг Булунғур туманида туғилган. 1980 йиллар охирида қрим-татарларни ватанига қайтариш бошланганида, Умеровлар оиласи Қримга қайтишга муваффақ бўлган.
У “Қрим татарлари жамияти” жамоат ташкилотининг асосчиларидан бири, шунингдек, қрим-татар халқи етакчиси Мустафо Жемилевнинг маслаҳатчиси бўлган. 2019 — 2022 йилларда Умеров Олий Раданинг “Овоз” фракциясидан депутат бўлган, кейин эса Давлат мулки жамғармасини бошқарган.
Изоҳ (0)