Арманистон Хавфсизлик кенгаши котиби Армен Григорян Ереваннинг Коллектив хавфсизлик шартномаси ташкилоти(КХШТ)даги иштироки мамлакат учун “маълум муаммолар” туғдираётганини айтди. Хусусан, бу Арманистонга Ғарб давлатларидан ҳарбий ёрдам олиш имкониятига таъсир қилмоқда, деди Армен Григорян Арманистон Жамоат телевидениесига берган интервьюсида.
Григоряннинг сўзларига кўра, расмийлар хавфсизлик соҳасида ҳамкорликни мустаҳкамлаш бўйича хорижий ҳамкорлар билан жадал ишлаб келяпти ва буни давом эттириш ниятида.
У Ереваннинг яқинда “Ғарб давлатларидан бири” билан олиб борган музокаралари, унда Арманистонни “ноҳарбий” шаклда қўллаб-қувватлаш масаласи муҳокама қилинганини эслатиб ўтди.
“Муҳокама бошида улар Арманистон — КХШТ аъзоси, дейишди, лекин ишчи гуруҳ келиб, биз билан музокара ўтказгач, кўп масалаларда уларнинг Арманистонга муносабати ўзгарди”, — деди Армен Григорян.
КХШТ Арманистонга қандай наф келтиряпти, деган саволга жавоб берар экан, Григорян 2020 йилдан бери бирор ёрдам кўрсатилганига мисол топиш қийинлигини айтди.
“Арманистонга уч марта ҳужум уюштирилди, якунда эса ҳарбий альянс деб аталувчи бу ташкилот Арманистондаги вазият бўйича фақат миссия юборишни таклиф қилмоқда. Бу жиддий чора эмас”, — деди Григорян.
Аввалроқ Арманистон бош вазири Никол Пашинян КХШТ миссияси Арманистон ҳудудида ишламаслигини, чунки у республика чегарасини белгиламаслигини айтганди. Бунга жавобан Кремль КХШТни “ўта нуфузли ва самарали ташкилот” деб атади ва Россия бу борада Арманистон билан мулоқотни давом эттиришини таъкидлади.
Май ойининг охирида Арманистон ва Озарбайжон бир-бирининг ҳудудий яхлитлигини тан олди.
Изоҳ (0)