Россия ва Шимолий Корея Украинага қарши урушда фойдаланиш учун қурол-яроғ етказиб бериш бўйича яширин музокаралар олиб бормоқда ва бундай муҳокама “фаол равишда олдинга силжимоқда”. Бу ҳақда Оқ уй Миллий хавфсизлик кенгашининг стратегик алоқалар бўйича координатори Жон Кирби брифингда маълум қилди.
Кирбининг айтишича, Россия мудофаа вазири Сергей Шойгу яқинда Шимолий Кореяга борганида “Пхеньянни Россияга артиллерия ўқ-дориларини сотишга кўндирмоқчи бўлган”. Шундан сўнг Россия президенти Владимир Путин ва Шимолий Корея етакчиси Ким Чен Ин икки томонлама ҳамкорликни кенгайтириш тўғрисидаги ваъдалардан иборат мактуб алмашган, Россия расмийларининг яна бир гуруҳи КХДРга йўл олган, деди Кирби.
Оқ уй фикрича, делегациянинг мақсади Москва ва Пхеньян ўртасида қурол-яроғ етказиб бериш соҳасидаги потенсиал келишувларни муҳокама қилишга кўмаклашишдир. Музокаралар натижасида Россия “Украинада ишлатмоқчи бўлган бир неча турдаги ўқ-дориларнинг сезиларли миқдорини олиши керак”, дея огоҳлантирди Кирби. Бундан ташқари, Москва Пхеньян билан қурол ишлаб чиқариш учун хом ашё харид қилиш бўйича шартномалар тузиши мумкин.
Россия Хитой билан ҳам қурол-яроғ битимларини тузишга уринган бўлиши мумкин
2023 йил бошида АҚШ бир неча бор Москва ва Пекин ўртасида Украинада қўлланиши мумкин бўлган қуролларни етказиб бериш бўйича музокараларга эътибор қаратди.
Хитой урушдаги бетарафлигига ишора қилиб, бундай таъминот ҳақидаги хабарларни рад этди. Аммо ОАВ Россия ҳамон воситачилар орқали Хитой фирмаларидан қурол ва ўқ-дорилар сотиб олаётганини кўрсатадиган ҳолатларни аниқлади. Расмий Пекин бу хабарларга ҳеч қандай муносабат билдирмади.
Бундан ташқари, август ойида Британия разведкаси Украинага ҳарбий ҳужум бошланганидан буён Россия Хитойдан ўн минглаб юклар, жумладан, дронлар, вертолётлар ва хом ашё олганига эътибор қаратди. Баъзи юкларни қабул қилувчилар Европа Иттифоқи ва АҚШ санкциялари остидаги Россия компаниялари бўлиб чиқди.
Москва қурол эвазига Шимолий Кореяга БМТда қўллаб-қувватлов таклиф этиши мумкин
Россия БМТ Хавфсизлик кенгаши доимий аъзоси сифатида унинг резолюцияларига вето қўйиш ҳуқуқига эга ва бундан Шимолий Кореяга нисбатан қаттиқроқ санкцияларни блоклаш учун бир неча бор фойдаланган. Бу сўнгги йилда тез-тез кузатилди, натижада Қўшма Штатлар Россия ва Хитойни Пхеньян нинг милитаристик ҳаракатларини яширишда бевосита айблади.
The New York Times газетасининг ёзишича, Москва КХДР билан алоқаларни фаол равишда мустаҳкамламоқда. Шу тариқа, 2022 йилда Россия Украинага қарши урушда фойдаланиш учун Шимолий Кореядан қисқа масофали ракеталар ва артиллерия снарядларини сотиб олишни бошлаган. Шу билан бирга, Россия урушда техника ва ўқ-дориларни йўқотгани ҳамда Ғарб санкциялари туфайли КХДР каби давлатлардан ёрдам сўрашга тобора кўпроқ мажбур бўляпти, деб таъкидлаган АҚШ Молия вазирлиги.
Изоҳ (0)