Туркияда 5 сентябрь куни кечқурун кучли ёмғирлар бир вақтнинг ўзида бир нечта вилоятларни қамраб олди. Истанбулда эса табиий офатдан энг кўп Башакшеҳир тумани зарар кўрди. У ердаги канал ўзанидан тошиб, бир қанча машиналарни сел олиб кетди. Ёмғир оқибатида метро бекати ва кутубхонани ҳам сув босди.
Гувоҳлар ижтимоий тармоқларда лойқа сув машиналарни оқизаётгани ва биноларни сув босгани акс этган видеоларни жойлади.
Қутқарувчилар Миллий кутубхонадан ўқувчилар ва ходимларни эвакуация қилиб, туман ҳокимлиги биносига олиб кетди.
Истанбул расмийлари сув тошқини оқибатида ҳалок бўлганлар икки кишига етганини маълум қилди. Шаҳар ҳокими Экрем Имомўғлу тез орада фавқулодда баёнот билан чиқишни режалаштирмоқда. Унинг сўзларига кўра, расмийлар бундай ёмғирни кутмаган, баъзи ҳудудларда бир квадрат метрга бир вақтда 150 килограмм ёмғир ёғган.
Табиий офат оқибатларини бартараф этишда 2,1 мингдан ортиқ ходим ишламоқда.
Истанбул аэропорти яқинидаги туннель ҳам сув остида қолган, бу эса йўловчиларга аэропортга етиб боришга тўсқинлик қилмоқда.
Изоҳ (0)