Ким Чен Ин Шойгуга Шимолий Кореянинг замонавий дронларини кўрсатди (фото)

Шимолий Корея етакчиси Ким Чен Ин ва Россия мудофаа вазири Сергей Шойгу Пхеньян да бўлиб ўтган “Қурол-яроғ кўргазмаси — 2023”да иштирок этди, деб хабар бермоқда Корея марказий телеграф ахборот агентлиги (KCNA).

Кўргазмага ташриф чоғида Ким Шойгуга ташқи кўринишидан Американинг RQ-4 Global Hawk ва MQ-9 Reaper дронларига ўхшайдиган янги КХДР дронларини кўрсатган.

Кўргазмадан сўнг Россия мудофаа вазири ва КХДР раҳбари Корея уруши тугаганининг 70 йиллигига бағишланган концерт дастурини томоша қилган. Тадбирга нафақат Шойгу бошчилигидаги Россия делегацияси, балки Хитой делегацияси аъзолари ҳам таклиф этилган.

Хитой делегацияси раҳбари Ли Хунчжун Ким Чен Инга ХХР Раиси Си Цзиньпиннинг, Шойгу эса Россия президенти Владимир Путиннинг шахсий мактубини топширган.

Сергей Шойгу 25 июль куни Пхеньян нинг таклифи билан Шимолий Кореяга жўнаб кетганди.

Россия Украинага бостириб киришни бошлагач, КХДРга яқинлашди. Америка матбуоти разведка манбаларига таяниб, Москва Пхеньян дан ўқ-дорилар сотиб олаётгани ҳақида бир неча бор хабар берди. Расмий Шимолий Корея буни рад этди.