Россияда Евгений Пригожиннинг исёнидан кейин ҳибсга олингани айтилаётган генерал Сергей Суровикин озод этилди. Бу ҳақда The New York Times газетаси америкалик икки амалдор ва Россия Мудофаа вазирлигига яқин манбага асосланиб хабар бермоқда.
Нашрнинг Вашингтондаги суҳбатдошларига кўра, Суровикин қўйиб юборилганига қарамай, унинг учун, хусусан, ҳаракатланишда қандайдир чекловлар бор-йўқлиги номаълум.
Россия Мудофаа вазирлигига яқин манбанинг таъкидлашича, генерал ўз унвонини сақлаб қолган ва “техник жиҳатдан” ҳали ҳам Қуролли кучларда фаол офицер бўлиб турибди, аммо у энди “мансаб истиқболи”га эга эмас. Нашр суҳбатдоши, шунингдек, Суровикин 23 август куни Евгений Пригожиннинг авиаҳалокатидан бир неча кун ўтиб қўйиб юборилганини айтди.
Суровикин озод этилгани ҳақида 4 сентябрь куни журналист Ксения Собчак маълум қилганди. У ўзининг Telegram каналида генерал тасвирланган суратни жойлаштирди.
“Генерал Сергей Суровикин чиқди. Тирик, соғлом, уйда, оиласи билан бирга, Москвада”, — деб ёзган Собчак.
Сочида Россия — Туркия музокараларидан сўнг ўтказилган брифингда мудофаа вазири Сергей Шойгудан Суровикинга нисбатан тергов олиб бориляптими, деб сўралди. У ушбу саволга жавоб бермади. Журналист Фарида Рустамова ярим соатдан кейин Собчакнинг каналида генералнинг сурати пайдо бўлганига эътибор қаратди.
Сергей Суровикин Россия Аэрокосмик кучлари бош қўмондони лавозимида ишлаган. 2022 йил октябрь ойида у Украинадаги Россия кучларининг қўшма гуруҳи раҳбари бўлди, шундан сўнг Россия армияси Украинанинг энергетика ва фуқаролик инфратузилмасига қатор йирик ракета зарбаларини берди. Суровикин 2023 йил январигача Украинадаги рус қўшинларининг гуруҳланишига раҳбарлик қилган.
Суровикин ҳибсга олингани ҳақидаги маълумотлар “Вагнер” асосчиси Евгений Пригожиннинг исёнидан кўп ўтмай пайдо бўлди. Исён пайтида Сергей Суровикиннинг мурожаати тарқалди, унда “вагнерчи”ларни тўхтатиш ва “муаммоларни тинч йўл билан ҳал қилиш”га чақирилади. Америка разведка хизматларига кўра, Суровикин “Вагнер” асосчиси исён тайёрлаётганини олдиндан билган. Расмий равишда, генералнинг ҳибсга олингани ҳақидаги маълумотлар тасдиқланмади, аммо ўшандан бери у жамоат жойларида кўриниш бермади.
Изоҳ (0)