Жанубий Кореяда 4 сентябрь куни 120 мингга яқин мактаб ўқитувчилари бутун мамлакат бўйлаб кенг кўламли митинглар ўтказди, биргина Сеулда 50 мингга яқин ўқитувчи тўпланиб, норозилик намойишига чиқди.
Reuters хабарига кўра, ушбу акция 2 сентябрь куни Миллий ассамблея биноси яқинида 200 мингга яқин ўқитувчилар иштирокидаги митингнинг давоми бўлган. Ҳар икки акция иштирокчилари ҳукуматдан уларнинг ҳуқуқларини ҳимоя қилишни талаб қилмоқда. Ушбу кенг кўламли норозилик намойишларидан олдин ўқувчиларнинг ота-оналари томонидан руҳий тазйиққа дош беролмаган ўқитувчилардан бир нечтаси ўз жонига қасд қилган.
Умуман олганда сўнгги олти йил ичида Жанубий Кореяда 100 дан ортиқ давлат мактаблари ўқитувчилари ўз жонига қасд қилган, уларнинг ярмидан сал кўпи қуйи синфларда ишлаган. Охирги марта июль ойида бошланғич синфга дарс берадиган ёшгина ўқитувчи, август охирида эса яна икки ўқитувчининг ўз жонига қасд қилиши ҳолатлари кузатилган.
Уларнинг барчаси, ҳамкасблари ва қариндошлари билан мулоқотда, ўқитувчини том маънода ҳамма нарсада айблаган ота-оналарнинг босимидан шикоят қилиб келган. Қайд этилишича, жанубий кореялик ота-оналар ўқитувчиларни болаларга зўравонлик қилишда айблайди, уларга нореал талаблар қўяди, таҳдид қилади, куннинг исталган вақтида даъво билан қўнғироқ қилади.
Митингда иштирок этаётган ўқитувчилар ишга келмагани боис, бутун мамлакат бўйлаб кўплаб мактабларда дарслар бекор қилинган.
Жанубий Корея Таълим вазирлиги ўқитувчиларнинг жамоавий иш ташлаши қонунга зид экани ва ўқитувчилар ва директорларнинг ишдан бўшатилиши ёки ҳатто жиноий жавобгарликка олиб келиши мумкинлигидан огоҳлантирди, бироқ айни пайтда ўқитувчиларнинг аҳволини яхшилаш чораларини кўришга ваъда берди. Хусусан, расмийлар ўқитувчиларни ота-оналарнинг ноҳақ айбловларидан ва шахсий телефонларга қўнғироқлардан ҳимоя қилишга ваъда бермоқда.
“Болаларга нисбатан зўравонлик ҳақида асоссиз даъволар сони ортиб бормоқда, ўқувчиларнинг ҳуқуқларига ҳар томонлама эътибор қилиниб, ўқитувчиларнинг ҳуқуқлари беҳурмат қилмоқда”, — дейилади вазирлик баёнотида.
Изоҳ (0)