Япониянинг Tokyo Electric Power (ТEPCО) компанияси Фукусима-1 атом электр станциясидаги сувни океанга тўкишни бошлади. Жараён жонли эфирга узатилмоқда, деб хабар берди Associated Press.
Тозаланган сув қирғоқдан бир километр масофада сувости туннел орқали океанга тўкилмоқда. Кунига 460 тонна сув чиқарилади. АЭСдаги сувнинг ҳар тоннаси 1,2 минг тонна тоза денгиз суви билан суюлтирилади. Дастлабки 17 кун ичида 8 тоннадан камроқ сув чиқарилади.
Сувни тўкиш режаладагидек бошланди — шу ҳафта бошида расмийлар қулай об-ҳаво шароити ҳисобга олинса, жараён 24 август куни бошланишини маълум қилганди.
Хитой Фукусима АЭСдаги сувни океанга тўкишга қарши
2011 йилдаги зилзила ва сунами оқибатида юзага келган авариядан сўнг Фукусима АЭС ҳудудида шикастланган реакторларни совутишда фойдаланиладиган 1 000 дан ортиқ сув резервуарлари тўпланиб қолган, бу тахминан 1,3 миллион куб метр сувни ташкил этади. Япония расмийларига кўра, 2024 йил бошида барча резервуарлар тўлиб бўлади.
Уларда сақланадиган сув яхшилаб тозаланган, аммо унда ҳали ҳам водороднинг радиоактив изотопи — тритий бор, бу модда изсиз йўқолиб кетмайди. Япония ҳукумати бу сувни денгизга тўкиш зарурлигини айтиб, бу дунёнинг бошқа атом электр станцияларида ҳам одатий ҳол эканини таъкидламоқда.
Хитой АЭСдаги сувни океанга тўкишга қатъиян қарши. Хитой элчиси бу дастурни нотўғри деб атади ҳамда Япония дастурни тўхтатиб, биринчи навбатда қўшни давлатлар билан маслаҳатлашувлар ўтказиши кераклигини айтди. 4 июль куни Атом энергияси бўйича халқаро агентлик (МАGATE) раҳбари Рафаэл Гросси Японияга ташриф буюрди ва сувни океанга тўкиш қарорини маъқуллади. Унинг таъкидлашича, оқинди сув сифатига, балиқларга ва яқин атрофдаги манзилгоҳларга катта таъсир қилмайди.
Изоҳ (0)