“Дарё” репортажи: Наманган тановари, рақсга тушаётган момолар ва байрам мушакбозлиги (видео)

Намангандаги “Афсоналар водийси” боғида Мустақилликнинг 32 йиллигига бағишланган байрам тадбири бўлиб ўтди. Бу ҳақда “Дарё” мухбири Азизбек Абдувалиев хабар бермоқда.

Қайд этиш жоизки, байрам арафасида вилоятда кўплаб иқтисодий-ижтимоий аҳамиятга эга объектлар фойдаланишга топширилди.

Жумладан, Чортоқ деҳқон бозори, шу тумандаги ихтисослаштирилган мактаб, Янги Наманган туманида Бобораҳим Машраб номли хусусий мактаб, Stanford нодавлат таълим ташкилоти, Давлатобод туманида 8 та маҳаллани ўзаро боғловчи кўприк, Косонсой туманида кўп тармоқли марказий поликлиника, Чуст туманида мевани қайта ишлаш заводи, Янги Наманган шаҳарчаси марказий йўли ва Наманган халқаро аэропорти терминали шулар жумласидан.

“Вилоятни ижтимоий-иқтисодий ривожлантириш, маҳаллалар инфратузилмасини яхшилаш учун бу йилгидек катта маблағ ажратилган эмас. Жорий йил 1,5 мингдан зиёд объектни қуриш, таъмирлаш ва ободонлаштиришга жами 3,2 триллион сўмдан ортиқ маблағ йўналтирилди. Бу ўтган йилга нисбатан 1,7 триллион сўмга кўп”, — деди тадбирда сўзга чиққан вилоят ҳокими Шавкат Абдураззоқов.

Шундан сўнг театрлаштирилган томоша ва гала-концерт бошланди. Томошабинлар вилоят санъат усталари, таниқли хонандалар Лола Аҳмедова ва Сардор Тоировнинг чиқишларини олқишлар билан қарши олди.

Ўзбекистон халқ артисти Камолиддин Раҳимов ижросидаги машҳур “Наманган тановари” қўшиғини ҳофизнинг фарзанди Ҳусанбой Раҳимов ва шогирдлари жўровозликда куйлаб чиққани эса концертнинг ўзига хос авж нуқтаси бўлди ҳамда барчани рақсга чорлади.

Намангандаги Мустақилликнинг 32 йиллигига бағишланган тантанали тадбир байрам мушакбозлиги билан якунига етди.