Томошабинларга “Қор қўйнида лола”, “Ўтов “ ва “Жаннат қайдасан” фильмларидаги роллари билан яхши таниш бўлган актриса Замира Бешимова “Дарё”нинг YouTubeъдаги каналида интервью берди. У интервью чоғида отасиз улғайгани, моддий қийинчиликлари ва унга берилган ножўя таклифлар ҳақида сўзлаб берди.
— Болалигимда оиламдаги муҳитни муаммодек қабул қилар ва бундан қаттиқ ўксинар эдим. Гап шундаки, отамнинг ким эканини билмасдан, унинг меҳрини туймасдан катта бўлганман. Отам билан боғлиқ фақатгина битта хотирам бор. Отам бетоб бўлгани учун фақат касалхонада даволанарди. Олти ёшимда онам билан уни кўргани борганмиз. Мен сал нарида ўйнаб ўтирибман, ота-онам нималарнидир гаплашишяпти. Шунда тасодифан “Болани касалхонага олиб келма, юқиб қолиши мумкин, дейишяпти”, деган гап қулоғимга чалинган. Шундан кейин отам билан қайтиб учрашмаганмиз. Орадан кўп вақт ўтмай отамдан айрилганимни айтишган. Бобомнинг уйида отамнинг катта портрети бўларди. Унга қараб отамнинг қандай кўринишда эканлигини билганман. Кейинчалик, билсам, отам раҳматли сил касалига чалинган экан, — дейди Замира Бешимова.
Актриса икки фарзандни ёлғиз тарбиялаш онасига қийин кечгани, молиявий қийналгани ва мактаб формасини олишга ҳам имкони бўлмагани ҳақида сўзлаб берди.
— Болалигим мустақилликнинг илк йилларига тўғри келган. У давр молиявий қийинчиликлари билан кўпчиликнинг ёдида қолган бўлса ажабмас. Онамни қисқартиришлар сабаб ишдан бўшатишгандан кейин рўзғоримизда танглик сезилган. Ҳатто, ейишга нонимиз қолмаган кунлари ҳам бўлган. Ҳеч ёдимдан чиқмайди айни ўсмирлик чоғимда эрта-индин ўқув йили бошланадиган кунлар эди. Ҳамма дугоналарим янги кийимлар олдиришган, аммо онам мактаб формаси ҳам олиб беролмаган. Иложсизликдан онамнинг кўйлагининг ўлчамини ўзимга мослаб, мактабга кийиб борганман. У пайтларда онамни тушунмаганман. Ёшим улғайиб, она бўлганимдан кейин ўша вақтда онамга қанчалик қийин бўлганимни ҳис қилдим, — дейди актриса Замира Бешимова.
Замира Бешимова баъзи режиссёрлар томонидан ножўя таклифлар унга ҳам бўлгани ва у ҳамкасбларига бундай вазиятларда қандай йўл тутиш кераклиги ҳақида сўзлаб берди.
— Афсуски, кўп қизлар кино оламига алам билан кириб келишади. “Қандай бўлса ҳам машҳурликка эришаман. Машҳур бўлиб олсам ҳамма муаммоларим ўз ечимини топади”, деб ўйлашади. Ҳатто, баъзи қизлар очиқдан-очиқ “ҳомий” қидиришларини ҳам тан олишади. Бу аслида ижод эмас, буни тижорат деб таърифласак ҳам бўлади. Сиз бирон-бир буюмни сотмоқчи бўлсангиз, аввал уни озгина реклама қиласиз. Қиз ва аёллар ўзини ошириб-тошириб кўрсатиши ҳам шунга ўхшаш жараён. Буни асл санъат билан қиёслаш керак эмас. Афсуски, бундай таклиф нафақат санъат соҳасидаги, балки бошқа соҳага ҳам энди кириб келаётган ёш ва чиройли қизларга берилади. Менга ҳам бундай таклифлар бўлган, шу сабабдан ҳам жуда кўп роллар насиб этмаган. Аммо бундай жирканч таклифларга рози бўлиб, машҳурликка эришгандан кўра уни рад этган яхшироқ, — дейди актриса Замира Бешимова.
Суҳбатни тўлиқ ҳолда қуйида томоша қилишингиз мумкин:
Изоҳ (0)