Туркиялик машҳурларнинг ҳаёти қизиқарли воқеаларга бой. Масалан, Бурак Ўзчивит ўзига қимматбаҳо машина сотиб олди, Ҳанде Эрчел эса ижтимоий тармоқларда мухлисларини ёқимли кадрлар билан хурсанд қилишда давом этмоқда.
Бурак Ўзчивит
Январь ойида Бурак Ўзчивит ва Фаҳрие Эвжен иккинчи марта ота-она бўлишди. Жуфтлик чақалоққа Керем деб исм қўйишди, бу исм мурувватли, ҳурматли, саховатли деган маънони англатади.
“Чолиқуши” телесериали юлдузи қимматбаҳо қора 2023 Gmc Sierra Denali Pikap машинасини сотиб олди. Транспорт унга 375 минг долларга тушди.
Маҳаллий журналистлар 37 ёшли ота машинасининг давлат рақамига Керемнинг исмидаги ҳарфларни қўйганини пайқаган. Бироқ актёр бу машинани рафиқасига совға қилганми ёки йўқми, бу ҳақда аниқ маълумот берилмаган.
Ўтган йили Бурак ўз севгилисига 270 минг долларлик машина совға қилишга тайёрланаётгани ҳақида миш-мишлар тарқалган эди. Қайд этилишича, актёр пулини омонатга қўйган ва буюртма учун навбатда турган. Кўриниб турибдики, актёрнинг мухлислари совға ҳақида ҳеч қачон билмайди, чунки санъаткорлар жуда камтар ва ўз бойликларини намойиш қилмайди.
Актёрларнинг тўнғич ўғли Каран аллақачон ижтмоий тармоқлар ва реклама роликларининг юлдузига айланган. Жуфтлик кичкина фарзандининг юзини ҳалигача оммага кўрсатмаган.
Мухлислар ҳозир Ҳанде Эрчелнинг ҳаётини диққат билан кузатишмоқда. “Эшигимни қоқ” сериалида Эда ролини ижро этган актрисанинг Ҳакан Сабанжи билан муносабатлари кўплаб шов-шувларга сабаб бўлмоқда. Жуфтлик узоқ вақтдан буён ўз ҳис-туйғуларини оммага кўрсатиб келмоқда, ҳатто папарацсилар уларни бирга суратга олган.
Актриса тез-тез севгилиси билан саёҳатга чиқади ва у аллақачон Ҳаканнинг оила аъзолари билан учрашган. Бизнесменнинг қариндошлари унинг актриса билан муносабатларини маъқулламасликлари ва ҳар томонлама уларнинг муносабатларига қарши чиқишлари муҳокама қилинди.
Ҳанденинг ташқи кўринишига қараб, у севгилисининг ота-онаси билан тушунмовчиликларни бошдан кечирмоқда деб айтиб бўлмайди, у барча фотосуратларида ёрқин табассум қилади. 29 ёшли актриса яқинда ижтимоий тармоқларидаги саҳифасига уй ҳайвонлари билан тушган бир қатор суратларини жойлаштирди. Суратларда унинг оддий тор кўйлак кийганини, Гарри Поттер оламидан илҳомланиб яратилган чашкани қўлида ушлаб турганини кўриш мумкин.
Бу пост актрисанинг мухлисларини ҳайратда қолдирди. Ҳанденинг мухлислари: “Унинг ажойиб чашкаси бор, мен ҳам шунақасидан хоҳлайман. Кузда сизга керак бўладиган қулай нарса”, “Ажойиб илиқ фотосуратлар”, “У ҳар доим шундай эстетик тарзда суратга тушади. Унинг уйида тушган суратларини яхши кўраман”, — деб изоҳ қолдирган.
Ҳанденинг айрим мухлислари эса унинг сўнгги бир неча ой ичида жуда озиб кетганини пайқаган. “Жуда нозик”, “Ҳанде озғин бўлишни ҳам ҳаддан ташқари ошириб юборди”, — деб изоҳ қолдирган актрисанинг хавотирга тушган мухлислари.
Айтганча, яқинда актриса бир тойчоққа ёрдам бериб, яна бир хайрли ишга қўл урди. Ўмур лақабли тойчоқ онасини йўл-транспорт ҳодисасида йўқотган. “Менинг Ҳасан исмли қадрдон дўстим бор, уни жуда яхши кўраман. У Мардинда яшайди, муҳтож ҳайвонлар учун протез оёқлар ясайди. Ҳасан менга Ўмур ёрдам ва қўллаб-қувватлашга муҳтожлигини айтди. У менга агар хоҳласам, тойчоқни асраб олишим мумкинлигини айтди. Унга шуни ҳам сўраб ўтирасанми, дедим ва таклифни мамнуният билан қабул қилдим”, — дейди актриса интервьюсида.
Изоҳ (0)