“Қор қўйнида лола”, “Ўтов”, “Тўқликка шўхлик”, “Одноклассники” каби фильмлардаги турфа образлари билан томошабинлар меҳрини қозонган актриса Замира Бешимова сўнгги пайтларда экранларда кўринмай қолди. У “Дарё”га берган интервьюсида ушбу ҳолатни саломатлиги билан боғлиқ муаммолар билан изоҳлади.
— Инсон ёши улғайган сари ўзи учун нима кераклигини ва муҳимлигини англар экан. Ҳозир мен фарзандларимга кераклигимни англадим. Бир муддат ижодга алоҳида эътибор бердим, иштирокимдаги фильмларнинг кети узилмади. Аммо бу соғлиғимга ёмон таъсир этди. Чунки ҳамиша менга қийналган жабрдийда аёлларнинг ролини беришади. Мен ролни ичимдан ҳис қилиб ижро этаман. Афсуски, бу юракка ёмон таъсир қилар экан. Шу боис бир оз танаффус қилишга, соғлиғимга ва фарзандларимга етарлича вақт ажратишга қарор қилдим. Айримлар ўйлагандек, ижоддан бутунлай узилганим йўқ. Ёш истеъдод эгаларига сабоқ берувчи ижодий студиям бор, — дейди актриса.
Замира Бешимова 2021 йили бошига оғир мусибат тушгани ва икки кун комада бўлгани ҳақида сўзлаб берди.
— Бу нарсани касб касаллиги десам ҳам бўлади, кўплаб актёрларнинг қон босими ёки юраги билан боғлиқ муаммоси бор. Яратганнинг меҳрибонлигини қарангки, ўша куни онам бизнинг уйга меҳмонга келди. Балки, онамнинг кўнгли сездими, ўша куни уйимизда ухлаб қоладиган бўлди. Рости, ўша кундаги воқеалар қандай содир бўлганини ҳам билмайман. Кўзимни очсам, жонлантириш бўлимида ётибман. Икки кун комани бошдан кечирибман.
Инсультдан кейин ўзимни бутунлай оиламга бағишладим, шунақа ҳолат бўлар экан, кўзингизни юмишга қўрқар экансиз ва бутунлай ҳаёт тўхтаб қолгандек туюлар экан. Ўлим ҳақ, у ҳамманинг бошида бор. Бироқ инсон тайёр бўлмас экан, эртага ўламан деган нарса бўлмас экан. Бутун ҳаётингиз кўзингиз олдидан ўтар экан, фарзандларим кўзимнинг олдидан ўтди. Кўп нарсани, шу нарса ҳақиқатан ҳам менга керакми, бу ерга боришим, шу ишни қилишим шартми, деб таҳлил қилишни бошладим.
Ҳозирги кунда мен учун энг қимматли бойлигим — фарзандларим. Кўпинча ота-оналар фарзанди билан алоқани йўқотиб қўяди. Фарзанд кўчага чиқиб кетади, ота-она карьера қиламан деб ўртадаги ришта узилиб қолади. Шу нарсани йўқотиб қўймасликка ҳаракат қиляпман, — дейди Замира Бешимова.
Замира Бешимова инсульт бўлгани фарзандларига ёмон таъсир қилгани ва ўша пайтда нимадан қўрққани ҳақида гапирди.
— Кўчада юрганимда машиналар кўп жойдан ўтаётган вақтим кўзимнинг олдига эҳтиёт бўл, сени уйда тўртта боланг кутяпти деган нарса келади. Ҳозир ўйлайдиган нарсам шу бўлиб қолган. Менга нимадир бўлса, болаларимнинг аҳволи қандай кечади деб ўйлайман. Биламан, барибир кўчада қолиб кетишмайди, қарайдиган, боқадиган одам бўлади, бироқ онанинг ўрнини ҳеч ким босолмайди. Эртага уларнинг бошига тушади, нима қилади деган нарса одамни ўйлантиради. Бу томондан одам ўзи учун қўрқмас экан.Икки кун комада бўлдим, ҳеч нарсани эслай олмайман. Менга укол қилишган, кийимларимни алмаштиришган.
Инсоннинг ҳаёти ўтиб кетади, худди телевизорни ўчириб қўйгандек гап экан. Сиз учун ҳеч нарса ўзгармайди, орқангиздан қоладиган инсонларнинг ҳаётини ўзгартириши мумкин экан. Инсульт бўлганимда кичкина фарзандим икки ёшга тўлмаган эди. Унинг кўзларини, болаларимнинг атрофимда қандай гирдикапалак бўлганини кўрдим ва биринчи навбатда шуларга керак эканман деб ўйладим, — дейди актриса.
Суҳбатни тўлиқ ҳолда томоша қилишингиз мумкин.
Изоҳ (0)