Хитойдан Наманган вилоятига 100 та янги автобус олиб келинади. Бу ҳақда Транспорт вазирлиги матбуот хизмати хабар берди.
Маълум қилинишича, Наманган вилояти ҳокими ўринбосари Саидаҳмад Султонов Тошкент шаҳрида Yutong bus cо.,LTD компаниясининг МДҲ мамлакатлари бўйича президенти Джефф Сяо бошчилигидаги делегация вакиллари билан учрашган.
Учрашувда вилоятда аҳолига кўрсатилаётган транспорт хизматлари сифатини ошириш мақсадида йўловчи ташиш фаолияти билан шуғулланувчи корхоналар ҳаракат таркибини янгилаш, замонавий автобуслар сотиб олиш ва уларга сервис хизматлари кўрсатишни ташкил этиш билан боғлиқ жиҳатлар муҳокама этилган.
Музокаралар давомида “Ҳумо авто плюс” МЧЖ ҳамда Yutong Hongkong Limited компанияси ўртасида 100 дона ZK6890HG моделидаги автобусларни сотиб олиш юзасидан шартнома имзоланган.
Президент Шавкат Мирзиёев ўзининг Олий Мажлис ва Ўзбекистон халқига йўллаган мурожаатномасида жамоат транспорти мутлақо ўзгариши ҳақида айтган эди. Шундан сўнг апрель ойида Тошкентга Хитойдан 268 та автобус ва электробуслар олиб келинди.
Май ойида Бухорога янги 100 та автобус ва микроавтобус, июль бошида Сирдарё вилоятига эса 160 та янги автобус олиб келиниши маълум бўлди. Аввалроқ “Тошшаҳартрансхизмат”га йўловчиларни ташишда кўриладиган зарарларни қоплаш учун 18 миллиард сўм ажратилгани, Тошкентдаги 32 та автобус йўналишида “кунлик план” бекор қилингани ҳақида хабар берилган эди.
Изоҳ (0)