Хоразмга 2023 йил якунига қадар 100 та янги автобус олиб келинади. Бу ҳақда Транспорт вазирлиги матбуот хизмати хабар берди.
Қайд этилишича, вилоятда йўловчи ташиш фаолияти билан шуғулланувчи “Бунёдйўловчиташиш” МЧЖ Хитойнинг Zhongtong Bus Holding Cо., Ltd. заводи билан шаҳар йўналишлари учун 100 та автобус сотиб олиш бўйича шартнома имзолаган. Мазкур шартномага мувофиқ автобуслар 2023 йилнинг якунига қадар Хоразм вилоятига олиб келиниши режалаштирилган.
Ўзбекистон президентининг “Жамоат транспорти тизимини ислоҳ қилиш чора-тадбирлари тўғрисида”ги ПҚ–59-сонли қарорида белгиланган вазифалар ижросини таъминлаш мақсадида Хоразм вилояти транспорт бошқармаси бошлиғи Р.Бабаев ташаббускор тадбиркорлар билан биргаликда айни дамда Хитойда хизмат сафарида бўлиб турибди.
Хизмат сафари давомида Zhongtong Bus Holding Cо., Ltd. заводи фаолияти билан танишиб, сотиб олинадиган автобусларнинг етказиб берилиши, мазкур автобусларга сервис хизмати кўрсатиш ва доимий ҳамкорлик алоқаларини йўлга қўйиш юзасидан завод вакиллари билан учрашув ўтказилган.
Президент Шавкат Мирзиёев ўзининг Олий Мажлис ва Ўзбекистон халқига йўллаган мурожаатномасида жамоат транспорти мутлақо ўзгариши ҳақида айтган эди. Шундан сўнг апрель ойида Тошкентга Хитойдан 268 та автобус ва электробуслар олиб келинди.
Май ойида Бухорога янги 100 та автобус ва микроавтобус, июль бошида Сирдарё вилоятига эса 160 та янги автобус олиб келиниши маълум бўлди. Аввалроқ “Тошшаҳартрансхизмат”га йўловчиларни ташишда кўриладиган зарарларни қоплаш учун 18 миллиард сўм ажратилгани, Тошкентдаги 32 та автобус йўналишида “кунлик план” бекор қилингани ҳақида хабар берилган эди.
Изоҳ (0)