Коррупцияга қарши курашиш агентлиги томонидан давлат буюртмачилари амалга ошираётган харидларда қонунчилик талабларига риоя қилиниши ҳолатларини мониторинг қилиш ишлари давомида айрим давлат буюртмачилари томонидан бир қатор қонунбузилиш ҳолатларига йўл қўйилгани аниқланди. Бу ҳақда агентлик матбуот хизмати хабар берди.
Жумладан:
- Зафаробод туман болалар ва ўсмирлар спорт мактаби буюртмачилигида 2023 йил 2 август куни ўтказилган 286 миллион сўмлик спорт инвентарлари харид қилиш;
- Қорақалпоғистон Республикаси Жўқорғи кенгеси томонидан 2023 йил 4 август куни ўтказилган 912,4 миллион сўмлик ёзги мажлислар учун чарм томли шийпон қуриш;
- Мактабгача ва мактаб таълими вазирлиги ҳузуридаги Ихтисослаштирилган таълим муассасалар агентлиги тизимидаги Самарқанд шаҳридаги Президент мактаби буюртмачилигида 2023 йил 5 август куни ўтказилган 311,8 миллион сўмлик мактаб формалари харид қилиш;
- Қизилтепа туман йўллардан фойдаланиш унитар корхонаси томонидан 2023 йил 10 август куни ўтказилган 300 миллион сўмлик транспортда юк ташиш хизмати кўрсатиш юзасидан ўтказилган давлат харидларида қонунчиликка зид ҳолатлар аниқланган.
Жумладан, ушбу давлат харидларида “Давлат харидлари тўғрисида”ги қонуннинг 10-моддаси (рақобат ва холислик принципи), 14-моддаси (манфаатлар тўқнашуви), 20-моддаси (харид комиссиясининг ҳуқуқ ва мажбуриятлари), 46-моддаси (давлат харидлари жараёнидаги чекловлар) ҳамда Вазирлар Маҳкамасининг “Давлат харидларини амалга ошириш билан боғлиқ тартиб-таомилларни ташкил этиш ва ўтказиш тартиби тўғрисида”ги қарори билан тасдиқланган низомнинг бир қатор талабларига амал қилинмаган.
Хусусан, ушбу харидларда иштирок этган талабгорларнинг ҳужжатлари харид комиссияси аъзолари фойдаланган қурилмалар (ИП-манзиллари бир хил) орқали электрон платформага юкланган ҳамда айрим иштирокчиларнинг таклифлари харид қилиш ҳужжатларида кўрсатилган баҳолаш мезонларига зид равишда баҳоланган.
“Мазкур ҳолатлар бўйича агентлик томонидан харид комиссияларининг баённомаларини бекор қилиш тўғрисида буюртмачиларга тақдимномалар киритилиб, қонунбузилиш ҳолатлари бартараф этилди”, — дейилади хабарда.
Шунингдек, ушбу ҳолатлар юзасидан тўпланган ҳужжатлар қонуний қарор қабул қилиш учун Бош прокуратура ҳузуридаги Иқтисодий жиноятларга қарши курашиш департаментига юборилган.
Давлат харидларининг бекор қилиниши
Бундан олдин “Тошкент дон маҳсулотлари” АЖ буюртмачилигида юк ташиш хизмати кўрсатиш юзасидан ўтказилган 500 миллион сўмлик давлат харидида қатор қонун бузилиши ҳолатлари аниқланганди. Шунингдек, Наманган халқаро аэропорти ўтказган қарийб 1,5 миллиард сўмлик, Фарғонада эса асфалт хариди бўйича ўтказилган салкам 3,5 миллиард сўмлик тендерлар бекор қилингани тўғрисида хабар берилганди.
Изоҳ (0)