Статистика агентлиги маълумотларига кўра, 2023 йилнинг январь—июль ойларида Ўзбекистоннинг ташқи савдо айланмаси 34,9 миллиард доллардан ошган.

Қайд этилишича, ташқи савдо айланмаси ҳажми ўтган йилнинг мос даврига нисбатан солиштирилганда 23,3 фоизга ошган.

Экспорт – 14,9 миллиард доллар:

• маҳсулотлар – 12 миллиард;
• хизматлар – 2,9 миллиард.

Импорт – 20 миллиард доллар:

• маҳсулотлар – 18,8 миллиард;
• хизматлар – 1,2 миллиард.

Ўзбекистон давлат қарзи 2022 йилда 29,2 млрд долларни ташкил этиб, ялпи ички маҳсулотга нисбатан 36,4 фоизга етган. Бу мамлакат давлат қарзининг шу пайтга қадар энг юқори кўрсаткичи ҳисобланади.

Ўзбекистон иқтисодиётининг ривожланиш прогнозлари

Ўзбекистонда 2023 йилда иқтисодий ўсиш 5,1 фоизни ташкил этиши (Европа ва Марказий Осиё минтақасидаги ҳозирда прогноз қилинаётган энг юқори ўсиш) ва ўрта муддатли истиқболда босқичма-босқич тезлашиши прогноз қилинган.

Россиянинг Украинадаги уруши ва Россияга қарши жорий этилган санкциялар билан боғлиқ транспорт логистикасидаги қийинчиликлар озиқ-овқат ва энергия нархларининг юқори бўлишига ва шахсий истеъмолни камайтиришга туртки бўлиб қолиши кутилмоқда.