Ҳамширалар академияси фаолиятини ташкил этиш чора-тадбирлари тўғрисида ҳукумат қарори лойиҳаси жамоатчилик муҳокамаси учун эълон қилинди.
Унга кўра, Ҳамширалар академияси Чилонзор Абу Али ибн Сино номидаги Жамоат саломатлиги техникуми негизида ташкил этилади. Шунингдек, тиббиёт олий таълим муассасаларида ўқиш муддати тўрт йиллик “олий малакали ҳамшира” бакалавриат таълим йўналиши бўйича мутахассисларни тайёрлаш жорий этилади.
Лойиҳага кўра, 2023/2024-ўқув йилидан бошлаб:
- ўқиш муддати икки йиллик бирламчи тиббиёт муассасалари учун “Умумий амалиёт ҳамшира”, “Патронаж ҳамшира”, “Тиббий ижтимоий иш”, “Тиббий профилактика иши” ходимлари ўқитилади;
- ўқиш муддати уч йиллик “Ихтисослашган ҳамшира”лар тайёрланади. Ихтисосликлари бўйича “Фельдшерлик иши”, “Ҳамширалик иши”, “Функционал ва лаборатор диагностика иши”, “Стоматология иши”, “Фармация” йўналишларида ўқитилади;
- ўқиш муддати 4 йиллик тиббиёт ОТМларида “Олий ҳамширалик иши” мутахассислари тайёрланади, Бунда ЖССТ тавсияларига кўра, тўрт йил ўқиган ҳамшираларга “Ҳамширалик иши бакалаври” (Bachelor of Nursing, BN) ёки “Ҳамширалик илмий бакалаври” (Bachelor of Science Nursing, BSN) унвони берилади.
Олий ҳамширалик иши магистратура (йўналишлари бўйича)да таълимини давом эттириш, кейинчалик мустақил илмий изланувчи (PhD, DSc) сифатида фаолият олиб бориш имконияти ва илмий унвон ва лавозимга эга бўлиш ҳуқуқи берилади
Шунингдек, соғлиқни сақлаш тизими ташкилотларининг энг истиқболли ўрта тиббиёт ходимлари (ҳамширалар, акушерлар, фельдшерлар, амалиётчи парамедиклар, лаборантлар)нинг камида 1000 нафарини 2 ҳафтадан 1 ойгача бўлган муддатга Жанубий Корея, Туркия, Европа мамлакатлари ва бошқа ривожланган хорижий давлатларга малака оширишга босқичма-босқич юбориш ҳамда хорижий мутахассисларни жалб этган ҳолда аралаш (офлайн, онлайн) мастер класс, тренинглар ўтиш бўйича беш йилга мўлжалланган дастур ишлаб чиқилади.
Соғлиқни сақлаш вазирлиги “Эл-юрт умиди” жамғармаси билан ҳамкорликда иқтидорли мутахассислар ҳамда Ҳамширалар академияси профессор-ўқитувчиларини хорижий давлатларда малакасини ошириш чораларини кўради.
Эслатиб ўтамиз, Ҳамширалар академияси ташкил этилиши ҳақида президентнинг 20 июндаги “Маъмурий ислоҳотлар доирасида соғлиқни сақлаш соҳасида давлат бошқарувини самарали ташкил қилиш чора-тадбирлари тўғрисида”ги қарорида белгиланганди.
Изоҳ (0)