Тошкент метрополитени ижтимоий тармоқларда метро бекатларининг бирида ёнғин чиққани айтилган хабарларга муносабат билдирди.
Маълум қилинишича, ушбу ҳолат 17 август санасида соат 00:20 лар атрофида содир бўлган. Бу вақтда бекат йўловчилар учун ёпиқ бўлади ва тизимли техник ҳамда хўжалик ишлари амалга оширилади.
“Ижтимоий тармоқда ёнғин дея таъкидланган жараён ҳеч қандай ёнғин эмас, балки бекатда амалга оширилган режавий хўжалик иши, яъни метро йўлидаги чақиқ тошларни текисловчи техник ускунадан чиққан тутун ҳамда чақиқ тошлардан ҳосил бўлган чанглардир”, — дейилади муносабатда.
Таъкидланишича, бу каби технологик жараёнлар белгиланган жадвал асосида тизимли равишда амалга оширилади ва унинг хавфсиз амалга оширилиши доимий тарзда назорат қилиб борилади.
2022 йилда Тошкент метрополитенида кузатилган муаммолар ҳақида бир қатор хабарлар берилган эди. Хусусан, поездлар бир неча бор тўхтаб қолган, ҳаракат йўналиши чекланганди. Шунингдек, Тошкент ерусти метросида юз берган қисқа туташув юзасидан расмий маълумот берилган, метро поезди “Олмазор” бекатида тўхтаб қолган, метро поезд носозлик сабаб “Чорсу” бекатида йўловчиларни тушириб қолдирган эди.
Изоҳ (0)