Иқтисодий тадқиқотлар ва ислоҳотлар маркази 2023 йил июль ойида Ўзбекистонда кўчмас мулк бозоридаги вазият қандай ўзгарганини таҳлил қилди.
Унга кўра, июль ойида Ўзбекистон кўчмас мулк бозори 5,5 фоизга ўсди. Вазият барқарор, битимлар ўсишда давом этмоқда.
“Уй-жой ижараси сегментидаги умумий фаоллик пасайишни секинлаштирди. Эҳтимол, август—сентябрь ойларида мавжуд талаб талабалар тоифаси билан тўлдирилади, бу эса ушбу сегментга қизиқишни оширади”, — дейилади марказ таҳлилида.
Июль ойида кўчмас мулк олди-сотди битимлари сони деярли 25 мингни ташкил этди, бу бир ой олдингига нисбатан 5,5 фоизга кўпдир. Энг катта ўсиш Андижон — 19,5 фоиз, Сирдарё — 16,8 фоиз ва Жиззах — 16,5 фоиз вилоятларида қайд этилди. Ўтган йилнинг июль ойига нисбатан уй-жой савдоси 22,7 фоизга ошди. Энг юқори ўсиш суръатлари Қорақалпоғистон Республикаси — 96 фоиз, Бухоро — 48 фоиз ва Сирдарё — 35 фоиз вилоятларида қайд этилди.
Тошкентда уй-жой ижараси бозоридаги вазият
Июль ойида ижара бозори барқарорлаша бошлади. Тошкентда квартираларни ижарага бериш нархининг пасайиши сезиларли даражада секинлашди. Агар июнь ойида ижара бозори 2,4 фоизга пасайган бўлса, июль ойида бу пасайиш 0,7 фоизни ташкил этди ва 1 квадрат метр учун 8,7 доллардан ошмади.
Уй-жой ижарасининг энг юқори нархлари Миробод — 11,7 доллар, Яккасарой — 10,7 доллар ва Шайхонтоҳур туманларида — 10,5 долларни ташкил этди. Пойтахтда уй-жой ижараси учун энг қулай манзиллар Учтепа (7,1 доллар), Сергели (6,4 доллар) ва Бектемир (5,6) туманлари бўлиб қолмоқда.
Шу билан бирга, ўтган йилга нисбатан Тошкентда ўртача ижара нархи 7,7 фоизга ошди. Йил бошидан буён ўртача ижара нархи деярли 15 фоизга камайди.
Иккиламчи кўчмас мулк бозори
Июль ойида иккиламчи кўчмас мулк бозорида уй-жой нархининг ўсиши давом этди. Ҳисоб-китобларга кўра, уй-жойларнинг 1 квадрат метр учун ўртача нархи июнь ойидаги 0,8 фоизга нисбатан 1,8 фоизни ташкил этди.
Иккиламчи уй-жойларнинг ўртача нархи 2023 йил бошидан буён 13 фоизга ошди, энг катта ўсиш февраль ойида 4,5 фоизга қайд этилди. Ўтган йилнинг шу даврига нисбатан нархлар 23,3 фоизга ошган. 2022 йил июль ойидан бошлаб уй-жой нархининг сезиларли ўсиши Наманган шаҳрида — 35,3 фоиз, Тошкент вилоятида — 32,3 фоиз ва Тошкент шаҳрида — 30,9 фоиз кузатилди.
Пойтахтнинг иккиламчи бозорида нархлар йил давомида 15,6 фоизга ошди. Февраль ойида иккиламчи уй-жой нархининг ўсиши энг юқори чўққисига чиқди ва 3,8 фоизни ташкил этди. Энг паст кўрсаткич июнь ойида 0,7 фоизга қайд этилган.
Ой давомида Тошкент шаҳрида иккиламчи уй-жойларнинг ўртача нархи 1,8 фоизга ошди. Нархларнинг энг юқори ўсиши Шайхонтоҳур — 3,3 фоиз, Яккасарой — 2,9 фоиз ва Бектемир — 2,6 фоиз туманларида қайд этилди.
Изоҳ (0)