Олий таълим, фан ва инновациялар вазирлиги 2023 йил якунига қадар давлат дастурида белгиланган 18 минг ўринли талабалар турар жойлари ҳам тўлиқ қуриб битказилишини маълум қилди.
Қайд этилишича, ҳозирги кунда Тошкент шаҳрида 48 минг 976 нафар талабалар (30 фоиз) турар жойига эҳтиёж мавжуд бўлиб, улар ижара шартлари асосида хусусий хонадонларда яшашига тўғри келади. Тюторлар орқали ушбу талабалар билан суҳбатлашилганда 23 минг 774 нафар талаба (2, 3, 4-курслар) Тошкент шаҳрида ижара хонадони мавжуд эканини маълум қилган. Яъни уларнинг аксарияти аввалдан яшаб келаётган ижара уйларини сақлаб қолишган ёки олдиндан ижара уйларини банд қилиб қўйган.
Шу ҳолатда ижара хонадонларига жойлашишга эҳтиёжи бўлган (ётоқхонадан жой берилмаган, ўз уйи, яқин қариндоши мавжуд бўлмаган ва ижара хонадони ҳам аниқ бўлмаган) талабалар 25 минг 202 нафарни ташкил этмоқда.
Бугунги кунда талабалар турар жойи билан тўлиқ таъминлаш имконияти бўлмаган олий таълим муассасалари масъуллари томонидан янги топилган ижара уйлари (рўйхат бўйича тахминий танлов асосида) ҳамда ижара уйлари ҳақидаги маълумотлар (манзили, хонадон эгасининг исми шарифи, телефони, ижара уйининг нархи кўрсатилган ҳолда) эълон қилинган инфокиоскалар ташкил этилган.
2023/2024-ўқув йилида 1-курс талабалари учун давлат ОТМ талабалар турар жойига жойлашиш давлат хизмати марказлари ва my.gov.uz орқали бепул электрон ариза бериш йўли билан амалга оширилади. Аризалар 20 августдан қабул қилинади. Шунингдек, 2-курс ва ундан юқори курс талабаларини талабалар турар жойига жойлаштириш анъанавий тарзда амалга оширилади.
Олий таълим, фан ва инновациялар вазирлиги март ойида ҳам Ўзбекистонда 2023 йил якунига қадар 18 минг ўринли талабалар турар жойлари қурилиб, фойдаланишга топширилишини маълум қилганди. Ўшанда йил якунига қадар талабалар турар жойи фондини 127 минг ўриндан ошириш режалаштирилгани айтилган эди.
Изоҳ (0)