Қарши давлат университетида талабаларни ётоқхона билан таъминлаш бўйича онлайн тизим ишга туширилди

Қарши давлат университетида талабаларни ётоқхона билан таъминлаш бўйича онлайн тизим ишга туширилди. Бу ҳақда “Дарё”га университет ахборот хизмати раҳбари Ойбек Юсупов хабар берди.

Таъкидланишича, университетда янги ўқув йилига тайёргарлик амалга оширилмоқда.

“Хусусан, олий таълим муассасасида талабаларни турар жой билан таъминлаш бўйича алоҳида штаб тузилиб, ижара хонадонларининг куз-қиш мавсумига тайёргарлиги, талабаларнинг дарс қилишлари, дам олишлари учун яратилган шароитлар, ижарага қўювчи оиланинг ижтимоий-маънавий аҳволи ўрганилмоқда. Ўрганишлар давомида хонадон эгаларига ижара шартномаси тузиш тартиби, унинг афзалликлари ҳақида батафсил тушунча берилмоқда”, — дейди Ойбек Юсупов.

Шунингдек, университетнинг мавжуд талабалар турар жойлари ҳам талабаларни кутиб олиш учун шай ҳолатга келтирилган.

“Яқинда олийгоҳ томонидан талабалар учун муносиб шароит ва қулайлик яратиш мақсадида ўзига хос янгиликка қўл урилди. Эндиликда университет ёшлари талабалар турар жойларига жойлашиш учун онлайн шаклда ариза топширишлари мумкин”, — дейди масъул.

Талабаларни турар жой билан таъминлаш ишларини мувофиқлаштириш бўлими бошлиғи Умиджон Холмуродовнинг қўшимча қилишича, онлайн платформа орқали талабаларга ётоқхона олиш учун аризаларни онлайн юбориш, тасдиқлаш ва рад этиш жараёнини кузатиш имконияти яратилган.

“Талабаларни турар жой билан таъминлаш жараёнининг рақамлаштирилганлиги, ёшларнинг вақт сарфламасдан, ортиқча оворагарчилик ва қоғозбозликсиз, тез ҳамда осон ётоқхонага жойлашиш имкониятини яратади. Ушбу янги онлайн платформанинг афзаллик жиҳатлари шундаки, унда талаба ётоқхона олиш учун аризаларни онлайн юбориш, тасдиқлаш ва рад этиш жараёнини кузатиб бориши ҳамда SMS хабарномалар олиши мумкин. Шунингдек, ётоқхоналарга ижтимоий ҳимояга муҳтож талабаларни жойлаштириш, шаффофликни таъминлаш мақсадида тўловларни онлайн шаклда амалга ошириш ва факультетлар учун ажратилган бўш жойларни онлайн кўриш каби қатор қулайликлар мавжуд”, — дейди Талабаларни турар жой билан таъминлаш ишларини мувофиқлаштириш бўлими бошлиғи Умиджон Холмуродов.