Сурхондарё ва Самарқанд вилоятларида истеъмолга яроқсиз ёғ маҳсулотларининг муомалага киритилишини олди олинди, деб хабар беради бош прокуратура ҳузуридаги департамент.
Маълум қилинишича, департаментнинг Жарқўрғон туман бўлими томонидан ИИБ ходимлари билан ҳамкорликда тезкор тадбир ўтказилган. Тадбирда фуқаро Н.Т. ва бошқалар ўз уйининг ёрдамчи хўжалигидаги яширин цехни ўзбошимчалик билан умумий фойдаланишдаги электр энергиясига улаб, 20 миллион сўмлик электр энергиясидан ноқонуний фойдалангани аниқланган.
Шунингдек, улар истеъмолчиларнинг ҳаёти ва соғлиғи хавфсизлиги талабларига жавоб бермайдиган ёғ маҳсулотларини ишлаб чиқараётгани маълум бўлган. Ушбу цехдан 6,3 минг килограмм қўлбола усулда тайёрланган ёғ, 1 725 килограмм чигит ва бошқа товар моддий бойликлари ашёвий далил сифатида олинган.
Шу каби департаментнинг Нуробод туман бўлими томонидан ИИБ ходимлари била ҳамкорликда ўтказилган тезкор тадбирда фуқаро С. ўз уйининг ёрдамчи хўжалигида яширин цех ташкил этиб, истеъмолчиларнинг ҳаёти ва соғлиғи хавфсизлиги талабларига жавоб бермайдиган ёғ маҳсулотларини ишлаб чиқараётгани аниқланиб, ушбу цехдан 40 килограмм қўлбола усулда тайёрланган ёғ, 10 килограмм чигит ва бошқа товар моддий бойликлари ашёвий далил сифатида олинган.
Мазкур ҳолатлар юзасидан Жиноят кодексининг 169-моддаси (ўғрилик) ва 186-2-моддаси (чигитдан олинадиган маҳсулотни қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
- Сурхондарёда июнь ойида ҳам истеъмолга яроқсиз ёғ маҳсулотлари муомалага киритилишининг олди олинганди.
- Хоразмда бўлса инсон соғлиғи учун хавфли спиртли ичимликларни тайёрлаб келган шахс фаолиятига чек қўйилгани,
- Наманганда 550 миллион сўмлик дори воситалари йўқ қилингани тўғрисида хабар берилганди.
Изоҳ (0)