O‘zbekistonda qo‘lbola usulda tayyorlangan alkogol mahsulotlarining noqonuniy savdosiga chek qo‘yish va bu bilan shug‘ullanuvchi yashirin sexlarni fosh etish borasida tezkor tadbirlar amalga oshirilmoqda, deb xabar beradi Davlat bojxona qo‘mitasi.
Jumladan, Xorazm viloyati bojxona boshqarmasi Kontrabandaga qarshi kurashish sho‘basi xodimlari tomonidan oldindan olingan tezkor maʼlumotga asosan, viloyat Davlat xavfsizlik xizmati va Ichki ishlar boshqarmasi xodimlari bilan hamkorlikda Gurlan tumanida tezkor tadbir o‘tkazilgan.
Natijada fuqaro D.B.ning yashash uyida jami 51,5 litr spirt mahsulotlari, 61 dona “Qaratow”, 480 dona “Urganch sharob O‘zST” yozuvli qopqoqlar, 458 dona bir xil seriya va raqamli aksiz markalar, 695 dona mahsulotlarni qadoqlashda ishlatiladigan oq va yashil rangli klyonkalar hamda 1 dona qadoqlashda foydalaniladigan uskuna daliliy ashyo sifatida olingan.
O‘tkazilgan surishtiruvlar bo‘yicha olingan xulosalarga ko‘ra, 480 dona aksiz markalar kompyuterning rangli printerida tayyorlangani aniqlangan.
Shuningdek, 51,5 litr spirt mahsulotlari isteʼmolga yaroqsiz, davlat standarti talablariga javob bermaydigan, isteʼmolchilar hayoti va sog‘lig‘i uchun xavfli ekani maʼlum bo‘lgan.
Mazkur holat yuzasidan fuqaro D.B.ga nisbatan Jinoyat kodeksining tegishli moddalari bilan jinoyat ishi qo‘zg‘atilgan.
Aprel oyida prezidentning “Aholini sifatli isteʼmol tovarlari bilan taʼminlashga qaratilgan qo‘shimcha chora-tadbirlar to‘g‘risida”gi qarori imzolangandi. Unda alkogol va tamaki mahsulotlarining noqonuniy muomalasi bilan bog‘liq qilmish uchun javobgarlikni kuchaytirish hamda jamoatchilik nazoratini taʼminlash ko‘zda tutilgan.
Izoh (0)