Ўзбекистон Open Data Watch ташкилотининг Open Data Inventory (ОDIN) Очиқ маълумотлар рейтингида 70 балл йиғиб, жаҳон бўйича 30-ўринни, Марказий Осиёда эса 1-ўринни эгаллади.
Мамлакат 2020 йилда 63 балл билан 44-ўринни, 2022 йилда эса 40-ўринни эгаллаган эди.
Open Data Watch — очиқ маълумотлар ва расмий статистика асосида фаолият олиб борувчи халқаро нотижорат ташкилот ҳисобланади. Тhe Open Data Inventory (ОDIN) рейтинги мамлакатнинг статистик таклифлари қанчалик тўлиқлигини ва улардаги маълумотлар халқаро очиқлик стандартига мос келишини баҳолайди.
Рейтингда Ўзбекистон ўрни яхшиланишига бюджет шаффофлиги, молия ва банк соҳасидаги очиқлик субиндитикаторлардаги сезиларли ўсишлар сабаб бўлган.
Рейтингнинг 2022 йилги натижаларида биринчи ўринни Сингапур эгаллаган. Кейинги поғоналарни эса Польша, Дания, Финляндия ва Норвегия банд этган.
Минтақа мамлакатлари ҳисобланган, Қозоғистон — 51, Қирғизистон — 92, Тожикистон — 126, Туркманистон 195-ўринларда қайд этилган.
Июль ўрталарида Ўзбекистон халқаро сўз ва ахборот эркинлигини қўллаб-қувватловчи Аrticle 19 ташкилотининг сўз эркинлиги рейтингида юқорилагани тўғрисида хабар берилганди. 2022 йил якунларига кўра тузилган The Global Expression Report рейтингига кўра, Ўзбекистон 161 та давлат ичидан 133-ўринни эгаллаган. Шунингдек, Ўзбекистон матбуот эркинлиги индексида дунёнинг 180 та давлати ичида 137-ўринни эгаллаб, 2022 йилги рейтингдаги ўрнидан тўрт поғонага пастлаган.
Изоҳ (0)