“Катта ҳамшира ва хўжалик бекаси ишдан олинди, бўлим бошлиғи иш ҳақининг 30 фоизи миқдорида жарима тўлади”. Масъуллар Қаршидаги шифохона бўйича муносабат билдирди

Қарши шаҳридаги вилоят Болалар кўп тармоқли тиббиёт марказида болалар даволанаётган палаталарда сувараклар юргани, болаларнинг онаси бундан хавотирга тушаётгани хабар берилганди. Вилоят Соғлиқни сақлаш бошқармаси мазкур воқеа бўйича муносабат билдирди.

Қайд этилишича, ҳолат вилоят соғлиқни сақлаш бошқармаси томонидан ўрганилган.

Жорий йилнинг 15 август куни вилоят болалар кўп тармоқли тиббиёт маркази гастроэнтерология бўлимида санитария-эпидемиологик осойишталик ва жамоат саломатлиги хизмати вилоят бошқармаси масъуллари билан ҳамкорликда дезинфекция ва дезинсекция тадбирлари амалга оширилди.

Мазкур ҳолат марказ ходимларининг навбатдан ташқари умумий йиғилишида муҳокома қилиниб, бўлимларда санитария қоидалари асосида иш юритиш борасида назоратни кучайтириш бўйича зарур чоралар белгиланди. Ўз вазифаларига масъулиятсизлик билан ёндашганлиги ва назоратни сусайтирганлиги учун гастроэнтерология бўлими катта ҳамшираси ва хўжалик бекаси эгаллаб турган лавозимидан озод этилди. Бўлим бошлиғига эса иш ҳақининг 30 фоизи миқдорида жарима жазоси белгиланди, — дейилади масъуллар маълумотида.