Қашқадарё вилоятининг Қарши шаҳридаги шифохонада даволанаётган болаларнинг онаси муассасадаги сувараклардан шикоят қилмоқда. Бу ҳақда жамоатчиликка ошкор қилган “Қашқадарё газетаси”нинг ёзишича, мазкур воқеа вилоят Болалар кўп тармоқли тиббиёт марказидаги ҳолат ҳисобланади.
Таъкидланишича, видеолавҳадаги тасвирлар шифохона гастроэнтерология бўлими, люкс тоифасидаги палатадан олинган.
.jpg)
Шароити яхшироқ деган ўй билан люкс хонага жойлашгандик. Ўрин учун бир кунга 100 минг сўмдан тўлов қилганмиз. Кечқурун сувараклар шунчалар изғийдики, ухламай болаларимизни қўриқлаб чиқамиз, — дейди нашр журналисти билан суҳбатлашган она.
Бу ҳолатни изоҳлаган шифохона масъули, бўлим бошлиғи Ҳамида Фахриддинова ҳолат юзасидан раҳбариятга, вилоят СЭО ва ЖCX бошқармасига билдирги киритганини маълум қилган.
Мазкур ҳолат бўйича маъмурият, СЭО ва ЖCX шуғулланади. Бу юзасидан уларга билдирги киритганман, — дейди у.
Вилоят санитария-эпидемиологик осойишталик ва жамоат саломатлиги хизмати бошқармаси эса билдирги уларга етиб бормаганини қўшимча қилган. Айтишларича, бу ҳақда уларга ҳеч ким маълумот бермаган ва марказ шаҳар ҳудудида жойлашгани учун масалага кўпроқ СЭО ва ЖCX Қарши шаҳар бўлими масъул.
Ҳақиқатан ҳам вилоят болалар кўп тармоқли тиббиёт маркази шаҳар ҳудудига кирганлиги учун биз назорат қилишимиз керак эди. Ўтган ҳафтада вилоятдан буйруқ чиқартириб, текширишга бормоқчи эдик. Лекин буйруқ вилоятнинг ўзига чиққан. Демак уларнинг ўзлари бориб текширишга ҳақли, — дейди СЭО ва ЖCX Қарши шаҳар бўлими масъул ходими Фарруҳ Юсупов.
Изоҳ (0)