Андижон, Сурхондарё ва Қашқадарё вилоятларида ноқонуний ер савдоларига чек қўйилди

Бош прокуратура ҳузуридаги департамент томонидан ўтказилган тезкор тадбирлар давомида ноқонуний ер савдоларига чек қўйилди.

Маълум қилинишича, департаментнинг Андижон вилояти Қўрғонтепа туман бўлими томонидан ДХХ ва ИИБ ходимлари билан ҳамкорликда тезкор тадбир ўтказилган. Тадбирда фуқаро Т.Х. “Озод” МФЙ ҳудудидаги “А.А.” МЧЖга қарашли бўлган 1 гектар ер майдонини фуқаро Л.Т.нинг номига расмийлаштириб олиб бериши эвазига 3 минг АҚШ долларини олган вақтида ашёвий далиллар билан ушланган.

Шу каби, департаментнинг Сурхондарё Жарқўрғон туман бўлими томонидан ИИБ ва Миллий гвардия ходимлари билан ҳамкорликда ўтказилган тезкор тадбирда фуқаро Х.И. “Ўзбекистон” МФЙ ҳудудидаги 24 сотих захирадаги ер майдонини фуқаро С.У.га 40 миллион сўмга сотган вақтида ашёвий далиллар билан қўлга олинган.

Худди шундай, Департаментнинг Қашқадарё вилоят бошқармаси томонидан ўтказилган тезкор тадбирда фуқаро Ҳ.Х. фуқаро Н.Т.га гўёки юқори лавозимда ишловчи танишлари ёрдамида Муборак тумани “Кончилар” МФЙ ҳудудидаги 6 сотих захирадаги ер майдонини унинг номига расмийлаштириб олиб бериши эвазига 30 миллион сўмни олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.

Ноқонуний ер савдолари

Апрель бошларида Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилган эди.