Тошкент шаҳри, Хоразм ва Наманган вилоятларида ер майдонлари савдоси билан боғлиқ фирибгарлик ҳолатлари фош этилди, деб хабар беради Бош прокуратура ҳузуридаги департамент.
Қайд этилишича, департаментнинг Хонқа туман бўлими томонидан тезкор тадбир ўтказилган. Тадбирда Б.А. исмли шахс фуқаро М.Ш.нинг ишончига кириб, унга Боғот тумани “Ашхобод” МФЙ ҳудудидаги бошқа фуқарога тегишли 5 сотих ер майдонини 10 минг доллар эвазига расмийлаштириб олиб беришини айтиб, 9 минг доллар ва 11 миллион сўмни олган вақтида ашёвий далиллар билан ушланган.
Шу каби, департаментнинг Наманган шаҳар бўлими томонидан ўтказилган тезкор тадбирда фуқаро Ж.И. фуқаро Ж.Х.нинг ишончига кириб, гўёки юқори лавозимда ишловчи танишлари ёрдамида Истеъмолчилар ҳуқуқини ҳимоя қилиш жамиятига қарашли 30 сотих ер майдонини унинг номига расмийлаштириб олиб бериши эвазига 9 минг доллар ва 40 миллион сўмни олган вақтида ашёвий далиллар билан қўлга олинган.
Департаментнинг Олмазор туман бўлими томонидан ДХХ ва ИИБ ходимлари билан ҳамкорликда ўтказилган тезкор тадбирда эса, Қибрай тумани “Обод” МФЙ хотин-қизлар фаоли Ш.Х. фуқаро И.Б.нинг ишончига кириб, унга танишлари ёрдамида ўзи ишлаётган маҳалладаги 3 сотих захирадаги ер майдонини унинг номига расмийлаштириб олиб бериш эвазига 2 минг долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 25, 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Ноқонуний ер савдолари
Бир неча кун олдин Сирдарёда беш гектар ер майдонини 40 минг долларга сотишга уринган опа-ука қўлга олинган эди. Апрель бошларида эса Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилганди.
Изоҳ (0)