Қашқадарё вилоятидаги автомобиль йўлларида ўрнатилган онлайн фоторадарлар сони 2023 йил 103 тага кўпайиб, 231 ни ташкил қилмоқда. Бу ҳақда вилоят ИИБ бошлиғи Шуҳрат Сотволдиевнинг Халқ депутатлари вилоят кенгашидаги нутқида маълум қилинди.
Масъулнинг изоҳ беришича, бунга вилоятдаги йўл-транспорт ҳодисаларининг асосий қисми тезликни ошириш натижасида содир бўлаётгани сабаб бўлган.
2022 йилдаги 565 та ҳодисанинг 349 таси ёки 62 фоизи, 2023 йилнинг айни кунигача содир бўлган 214 та ҳодисанинг 127 таси ёки 59,3 фоизи тезликни ошириш натижасида содир этилган. Шу сабаб вилоятга 128 дона онлайн тизимида ишловчи “Лочин-кўз” русумли тезликни ўлчаш фоторадар қурилмалари олиб келиб ўрнатилган. 2023 йилда ҳам ушбу фоторадар қурилмаларидан 103 дона олиб келиниб, ҳозирда онлайн фоторадар қурилмалари сони вилоятда 231 донага етказилиб, радарлар вилоят ҳудудидаги “Авария ўчоқлари”га ўрнатилди, — дейилади вилоят ИИБ бошлиғи маълумотларида.
Қашқадарёда шунингдек, “Atlas International Германия” компанияси томонидан ажратилган тезликни назорат қилувчи қурилмалари билан жиҳозланган (мултирадар) 8 та махсус автомобиллар ҳамда 5 та онлайн тизимида ишловчи “AutoCон” тезликни ўлчаш фоторадар қурилмалари бор.
Қолаверса, вилоятдаги ЙПХ инспекторлари бир вақтнинг ўзида 360 градус радиусда 11 та қоидабузарликни аниқловчи махсус майоқчали мобил комплекслардан фойдаланиб келмоқда, — дейди масъул.
Қўшимча қилинишича, вилоятда тадбиркорлик субъектлари томонидан 35 та чорраҳада 93 та камера, йўлларда 54 та радар мосламаларини ўрнатиш жойлари аукционда сотилган.
Қарши шаҳридаги 6 та чорраҳада 24 та камера ва 5 та тўғри йўл участкасида 5 та радар қурилмаси, Қарши туманидаги 1 та чорраҳада 4 та камера ва 3 та тўғри йўл участкасида 3 та радар қурилмаси, Косон туманидаги 4 та тўғри йўл участкасида 4 та радар қурилмаси, Қамаши туманидаги 1 та тўғри йўл участкасида 1 та радар қурилмаси ўрнатилди, — дейди Шуҳрат Сотволдиев.
2023 йилнинг ўтган олти ойида йўл ҳаракати хавфсизлиги ходимлари томонидан жами 151 минг 345 та маъмурий баённома расмийлаштирилиб, ҳуқуқбузарлардан жами 68 миллиард 494 миллион 707 минг сўм маъмурий жарималар ундирилган.
Изоҳ (0)