“Норматив-ҳуқуқий ҳужжатларнинг ва лойиҳаларнинг коррупцияга қарши экспертизаси тўғрисида”ги қонун 8 август куни президент томонидан имзоланди, деб хабар бермоқда Telegram’даги “Ҳуқуқий ахборот” канали.
Қонунга кўра, Норматив-ҳуқуқий ҳужжатларнинг ва лойиҳаларнинг коррупцияга қарши экспертизасини ўтказувчи субъектлар қуйидагилардан иборат:
- Коррупцияга қарши курашиш агентлиги;
- Адлия вазирлиги ва унинг ҳудудий бўлинмалари;
- норматив-ҳуқуқий ҳужжатлар лойиҳаларининг ишлаб чиқувчилари бўлган давлат органлари ва ташкилотларининг юридик хизматлари;
- тегишли норматив-ҳуқуқий ҳужжатлар ижросини таъминлаш ўз зиммасига юклатилган давлат органлари ва ташкилотлари.
Коррупцияга қарши курашиш агентлиги қуйидаги ҳолларда норматив-ҳуқуқий ҳужжатларнинг коррупцияга қарши экспертизасини ўтказади:
- ўз ташаббусига кўра —ҳар қандай норматив-ҳуқуқий ҳужжатларни, шу жумладан, ўрганиш ва текширишлар натижалари бўйича норматив-ҳуқуқий ҳужжатнинг қўлланилиши чоғида коррупцияга оид ҳуқуқбузарликлар факти аниқланган ҳолларда;
- Олий Мажлис палаталарининг ва улар органларининг, президентнинг топшириқларига кўра.
Адлия вазирлиги:
- Ўзбекистон қонунлари, президент фармонлари ва қарорлари, Вазирлар Маҳкамасининг қарорлари лойиҳаларининг;
- вазирликлар, давлат қўмиталари ва идораларнинг давлат рўйхатидан ўтказиладиган буйруқлари ҳамда қарорларининг коррупцияга қарши экспертизасини ўтказади.
Нодавлат нотижорат ташкилотлари, фуқароларнинг ўзини ўзи бошқариш органлари ва ОАВ норматив-ҳуқуқий ҳужжатларнинг жамоатчилик экспертизасини қонунчиликда белгиланган тартибда ўтказишга ҳақли бўлиб, ушбу экспертиза доирасида коррупцияни келтириб чиқарувчи омилларни бартараф этишга доир таклифлар ва тавсиялар ишлаб чиқилиши мумкин.
Ўзбекистон фуқаролари, фуқароларнинг ўзини ўзи бошқариш органлари, нодавлат нотижорат ташкилотлари, оммавий ахборот воситалари давлат органлари ҳамда ташкилотлари томонидан ўтказиладиган норматив-ҳуқуқий ҳужжатларнинг ва улар лойиҳаларининг коррупцияга қарши экспертизасини ўтказиш жараёнида иштирок этиши мумкин.
Норматив-ҳуқуқий ҳужжатлардаги ва уларнинг лойиҳаларидаги коррупцияни келтириб чиқарувчи асосий омиллар жумласига қуйидагилар киради:
- нормаларнинг барқарорлиги ва ҳуқуқий жиҳатдан мувофиқлиги билан боғлиқ бўлган коррупцияни келтириб чиқарувчи омиллар;
- ваколатлар, ҳуқуқ ва мажбуриятлар билан боғлиқ бўлган коррупцияни келтириб чиқарувчи омиллар;
- маъмурий тартиб-таомиллар билан боғлиқ бўлган коррупцияни келтириб чиқарувчи омиллар;
- назорат-текшириш фаолияти билан боғлиқ бўлган коррупцияни келтириб чиқарувчи омиллар.
Норматив-ҳуқуқий ҳужжатларнинг ва лойиҳаларининг коррупцияга қарши экспертизасини ўтказиш бўйича экспертлар реестри Адлия вазирлиги томонидан юритилади.
Коррупцияга қарши курашиш агентлиги давлат органлари ва ташкилотлари томонидан норматив-ҳуқуқий ҳужжатларнинг ва улар лойиҳаларининг коррупцияга қарши экспертизаси ўтказилиши чоғида уларга Адлия вазирлиги билан биргаликда услубий ёрдам кўрсатади.
Қонун расмий эълон қилинган кундан эътиборан кучга кирди.
“Норматив-ҳуқуқий ҳужжатларнинг ва улар лойиҳаларининг коррупцияга қарши экспертизаси тўғрисида”ги қонун Сенатнинг 22 июнь куни ўтказилган қирқ иккинчи мажлисида кўриб чиқилиб, маъқулланганди. Сенаторлар ушбу қонун Ўзбекистонда коррупцияга қарши курашишнинг ҳуқуқий асосларини янада такомиллаштиришга, коррупциявий ҳолатларнинг олдини олишга, шунингдек, амалдаги ҳамда қабул қилинаётган норматив-ҳуқуқий ҳужжатлар сифатининг ошишига хизмат қилишини таъкидлаганди.
Изоҳ (0)