Мазкур машҳурларнинг болалиги ғам-ташвишсиз, хотиржамликда ўтмаган. Кимдир охир-оқибат ота-онасини кечиради, кимдир уларни шахсий манфаатда айблаб, ўзи ўйлаган ҳамма нарсани айтади, баъзилари эса судга беришгача борган.
Брук Шилдс
Брук Шилдснинг онаси карьерасининг бошида унинг менежери эди. Ўша пайтдаёқ Шилдснинг жамоатчиликни ғазаблантирган етарлича роллари бор эди. Энг шов-шувли фильмлардан бири “Ёқимтой бола” фильми бўлган. 12 ёшида Брук ўзининг ёшидаги Ваёлет исмли қиз ролини ўйнайди — қизча фоҳишахонада кимошди савдосида товар сифатида сотилади. Картинада очиқ саҳналар ҳам бор эди. Канн кинофестивалида фильм шов-шувга сабаб бўлади, ҳатто ёш актрисага ҳужум қилишади — кимдир унинг сочларини кесишга ҳаракат қилади. Брукнинг сўзларига кўра, бу уни жуда қўрқитган ва руҳий травмага олиб келган.
Аммо Брук онасини кечиради. Интервьюларда доимо уни ҳимоя қилишга уринади. 2018 йилда қизларингизга “Ёқимтой бола” каби фильмда суратга тушишига рухсат берасизми, деган саволга Брук бунга рози бўлмаслигини тан олади. Афтидан, Брук ўйнаган ролидан унчалик мамнун бўлмаган.
Маколей Калкин
1990 йилда “Уйда ёлғиз” фильми чиққанидан кейин юлдузга айланган Маколей Калкиннинг менежери отаси Кит бўлган. Ўғлига нисбатан у жуда қаттиққўллик қилган: ролларни кечаси ёдлашга мажбурлаган — Маколей ўша пайтда атиги 11 ёшда эди. Кейинчалик актёр отаси шунчаки унга ҳасад қилганини айтади: отаси орзу қилган ҳамма нарсага ўғли 10 ёшга тўлмасданоқ эришганди.
Маколей 1994 йилда суратга олинган “Бойвачча Ричи” фильмидан сўнг актёрлик фаолиятини тўхтатади ва ота-онасига: “Ҳаммаси тугади. Умид қиламанки, ўзингизга керакли пулни ишлаб олдингиз, чунки энди мендан фойда йўқ”, дейди. Маколей 17 миллион долларлик бойлигини тасарруф этишларига йўл қўймаслик учун ота-онасини судга беради.
Дрю Бэрримор
Дрю Бэрриморнинг онаси қизи бор-йўғи 11 ойлигида пул ишлашни бошлаган. Айнан шу ёшда Дрю реклама роликларида рол ўйнай бошлайди. Аммо ҳақиқий машҳурлик Дрюга етти ёшида келади — у “Ўзга сайёралик” фильмида рол ўйнайди.
Қиз атиги тўққиз ёшга тўлганда, онаси уни машҳур Studio 54 клубидаги зиёфатларга олиб боради, у ерда Дрю биринчи марта ноқонуний моддаларни татиб кўради. 12 ёшида эса актриса аллақачон реабилитация марказида эди.
Ота-онангиз сизни эксплуатация қилаётганини ҳис қилганмисиз, деб сўрашганида, Дрю шундай жавоб берган: “Менимча, онамнинг барча қилганлари ҳаддан ошиш эди”.
Жуди Гарланд
“Оз мамлакати сеҳргари” фильми юлдузи Жуди Гарленд рол ижро этганида ўзини фақат севимли боладек ҳис қилганини тан олади — чунки онаси ундан мамнун эди. Жуди икки ёшидан саҳнага чиқа бошлайди. У Миннесота штатидаги отаси эгалик қиладиган кинотеатрда премьера олдидан опалари билан қўшиқ куйлайди ва рақсга тушади. Ҳақиқий муаммолар оила Голливудга яқинроқ бўлган Калифорнияга кўчиб ўтгандан кейин бошланади.
“Оиламиздаги хотиржамлик ва қувонч сўна бошлади. Тўсатдан онам биз юлдуз бўлишимиз кераклигини айтди. У бизни керакли одамлар кўриши мумкин бўлган ҳар қандай жойга судраб олиб борарди ”, — дейди Гарланд.
Тейлор Момсен
Тейлор Момсен икки ёшида ота-онаси туфайли Ford Modeling моделлик агентлиги билан шартнома тузди. Актриса 14 ёшида Момсен IMG Models билан шартнома имзолади. Суратга олиш ишлари, муқова учун фотосессиялар, қўшиқлар ёзиш — ёш Тейлорнинг ҳаёти беғубор болаликдан узоқ эди.
“Ҳеч ким икки ёшида ишлашни хоҳламайди, лекин менинг бошқа иложим йўқ эди. Мактабга бордим, кейин ўқишни ташладим. Дўстларим йўқ эди. Доим ишлардим ва менда ҳақиқий ҳаёт йўқ эди”, — дейди актриса.
Изоҳ (0)