Айни кунларда оиласи билан АҚШда яшаётган Отабек Маҳкамов “Дарё”нинг YouTube’даги каналига берган интервьюсида АҚШда ҳам адвокатлик қилаётгани ва ижтимоий тармоқлар учун видеолар суратга олишга алоҳида вақт ажратмаслиги ҳақида айтиб ўтди.
— Шу кунгача бирор марта видео суратга олиш учун саёҳат уюштириб, алоҳида вақт ажратмаганман. Саёҳатларимнинг бари муҳим учрашувлар ва тўй хизматлари билан боғлиқ. Рус шоираси Марина Светаеванинг яхши гапи бор: “Улгурмоқ бу муваффақият”. Иш бўйича бориб, бир йўла ана шу давлат ва унинг тарихи ҳақида видео суратга олишга ҳаракат қиламан. Аляскада олинган видеолар кўплаб шов-шувларга сабаб бўлди. Аслида, мен у ерга ўзбек тадбиркори билан учрашиш учун борганман. Аммо орадаги бир-икки соатлик бўш вақтда олинган видеолар интернет кузатувчиларига ҳам маъқул бўлди. Блогерликка даромад манбаи деб қарамайман. Шунчаки, ўзбек кузатувчилари орасида савияли контент яратиш тарафдориман холос. Видео олишдан аввал ўша ер ҳақида етарлича маълумот тўплайман, ўқиб ўрганаман ва билганларимни кузатувчилар билан бўлишаман. Видеоларим шунчаки олди-қочди гап-сўзлардан иборат бўлиб қолишини истамайман, — дейди Отабек Маҳкамов.
Отабек Маҳкамов Нью-Йоркдаги адвокатлик фаолияти ҳақида ҳам сўзлаб берди.
— “Яхши бузоқ иккита онани эмади”, деган гап бор. Нью-Йоркдаги радио ва тележурналистика бўйича ҳам фаолият юритаман. Аммо бу фаолиятимнинг асосини ташкил этмайди. Мен ҳуқуқ компаниясида ҳам адвокат сифатида ишлайман. АҚШда ўзбекистонлик ватандошларимиз кўнгилсиз воқеаларга учрашса, уларга суғурта компаниясидан пул ундириб беришга кўмаклашамиз. Ҳатто, 2,5 миллион долларлик компенсация пулини ҳам ундириб берганмиз.
Нью-Йоркда қонун шунчалик зўр ишлайдики, кўчада кетаётган одамнинг оёғи тойиб йиқилиб тушса, у йўл қурган ташкилотни судга бериш ҳуқуқига эга. Йўлни қурган ташкилот ҳар квадрат метрда номи ва телефон рақамларини қолдиради. Уларда яширинча иш қилиш деган нарса йўқ. Ҳаммаси шаффоф ва ҳамма қилган ишига жавоб беришга мажбур.
Яқинда самарқандлик ватандошимиз турист сифатида Нью-Йоркка келган ва боғда айланиб юрганда, оёғи тойиб йиқилиб тушган. Текширилса, боғнинг айнан ўша ҳудуди қинғир-қийшиқ экан. У аёлга 1 миллион доллар компенсация пули ундириб берилди. Агар воқеа кундузи эмас, кечқурун содир бўлганида янада кўпроқ пул ундириб берардик. Агар опанинг оёғида баландроқ пошнали туфли бўлганида пул камроқ бўларди. Хуллас, пул ундириш жараёнида шу каби сабаблар ҳам ўрганилади, — дейди Отабек Маҳкамов.
Отабек Маҳкамов бу гал Тошкентга келганида электр энергияси билан боғлиқ муаммоларга учрагани ҳақида ҳам гапириб ўтди.
— Ўзбекистонга келиб, энергияга тўламан. Шу боис, бир кунга бўлса ҳам Ўзбекистонга келиб кетган вақтларим бўлган. Аммо бу гал электр энергиясининг узилиши билан боғлиқ ҳолатларга кўп гувоҳ бўлдим. Машҳур телеканаллардан бири суҳбатга чақирди. Борсам чироқ йўқ, келганида ҳам электрнинг кам қувватлигидан ҳатто кондиционер ҳам ишламаяпти. Биз-ку чидаймиз, аммо бундай юқори ҳароратда ёши катта инсонларни қийнаш яхши эмас. Уларнинг соғликлари ёмонлашиши ҳеч гап эмас. Ҳатто, маълум муддат касалхоналарда ҳам электр энергиясининг бўлмаслиги жуда ачинарли ҳолат. Бу гапимни тегишли ташкилотлар эшитишади ва ўзларига тегишли хулосаларни чиқаришади, — дейди Отабек Маҳкамов.
Суҳбатни тўлиқ ҳолда қуйида томоша қилишингиз мумкин:
Изоҳ (0)