Шаҳзода Гарри ва герцогиня Меган қироллик оиласи аъзолигидан истеъфога чиққанидан кейин “молиявий жиҳатдан мустақил” бўлишга ҳаракат қилишди. Уч йил олдин Қўшма Штатларга кўчиб ўтгандан сўнг, улар жамғармаларини тежаш ва пул ишлаб топиш мақсадида Netflix каби компаниялар билан бир нечта йирик шартномалар имзолаганди.
Бироқ Сассексларнинг Spotify билан кўп миллион долларлик шартномаси бекор қилингандан сўнг, оммавий ахборот воситалари уларнинг молиявий аҳволи оғирлиги ҳақида гапира бошлади. Герцог ва герцогинянинг 46 миллион фунт стерлингга баҳоланган бойлиги кўпчиликнинг кўз ўнгида тугаб битаётгандек туюлмоқда. Ҳозирда жуфтликнинг яна қанча пули қолган? Ва энг муҳими, улар миллионларини нимага сарфлашади?
Гаррининг мероси
Опра Уинфри билан бўлган машҳур интервьюсида Гарри оиласи билан Қўшма Штатларга кўчиб ўтганда марҳум онаси малика Дианадан қолган меросга ишонганини айтганди. 1997 йил август ойида малика вафот этганида мазкур мерос тахминан 7 миллион фунтни ташкил этган. Бундан ташқари, 2002 йилда қиролича Елизаветта II вафотидан кейин матбуот Гарри ва Уилямга бувисининг бойлигидан тахминан 14 миллион фунт стерлинг тегишини ёзган, бу бойлик 70 миллион фунтга баҳоланганди.
Гаррининг маоши
2021 йил март ойида Гарри Сан-Франсискода жойлашган стартапга ишга кириш учун ариза топшираётганини эълон қилди. Гарри мураббийлик ва руҳий саломатлик хизматлари орқали ходимларни ўқитиш бўйича BetterUp компаниясининг раҳбари ҳисобланади. Компания директори шаҳзодага тўланадиган маош ҳақида маълумот бермаган. Бироқ Mirror нашрининг ёзишича, унинг маоши йилига 500 минг фунтдан 2 миллион фунт стерлинггача бўлиши мумкин.
Жуфтликнинг ёзган китобларидан оладиган гонорарлари
Биргина Буюк Британиянинг ўзида “Захира” китоби биринчи ҳафталардаёқ 750 000 нусхада сотилган. Гарри ўз таржимаи ҳолидан тушган маблағнинг бир қисмини хайрия ишларига сарфлаган, аммо бу пул унчалик катта эмас. MailOnline маълумотларига кўра, Сассекс герцогининг нашриёт билан имзолаган битими 16 миллион фунт стерлингга баҳоланган.
Меган аввалроқ болалар учун “Харрак” (“Скамейка”) номли китоб ёзган ва нашр этган. Герцогиня китоб учун аванс олганми ёки йўқми, номаълум, аммо брендинг бўйича мутахассис MailOnline’га бу маблағ 500 000 фунт стерлинггача бўлиши мумкинлигини айтган.
Меганнинг жамғармаси
Гарри билан танишишдан олдин Маркл хоним нисбатан муваффақиятли актрисалик карьерасига эга эди — у “Форс-мажор” сериали юлдузларидан бири бўлган. Рейчел Зейннинг ёрдамчиси ролининг ҳар бир эпизоди учун 38 минг фунт стерлингга яқин гонорар олгани тахмин қилинади. Бундан ташқари, Меган интернетда блог ҳам юритган ва Канаданинг Reitmans бренди учун кийим-кечаклар тармоғини яратган. Бироқ Меганнинг актрисалик ва блог юритишдаги даромадини унинг ҳозирги турмуш тарзи билан таққослаб бўлмайди.
Стартапларга киритилган инвестициялар
2020 йилда Меган ўзи инвестиция қилган веган-кофе компанияси Clevr Blends’ни сотишда ёрдам бериш учун Опра Уинфридан ёрдам сўрайди. Битимнинг қиймати маълум қилинмаган. Бу йил бошида Сассекс герцогиняси бренднинг реклама ролигида иштирок этди.
Эр-хотиннинг улуши бор яна бир корхона бу Ethic барқарор инвестиция фирмасидир. 2021 йилда герцог ва герцогиня улар фақат экологик ҳамда ижтимоий мақсадларга эга бўлган ва бошқаруви остида 1,3 миллиард долларга эга бўлган компанияларга сармоя киритадиган фирманинг “таъсир шериклари” ва инвесторлари бўлганини эълон қилишди. Улар компанияга қанча сармоя киритгани ва бу уларга қанча даромад (ёки зарар) келтиргани номаълум.
Жуфтлик имзолаган шартномалар
Гарри ва Меган қироллик оиласини тарк этганидан кейин имзолаган энг даромадли битимлардан бири Netflix билан бўлган — суммаси номаълум, аммо бу 87 миллион фунт (ёки 112 миллион доллар) бўлиши мумкинлиги хабар қилинганди. Бироқ Netflix’да улар учун ҳаммаси силлиқ кечмагани аниқ: ўтган йили Меган устида ишлаётган “Pearl” номли мултфильм лойиҳаси бекор қилингани маълум бўлди.
Юқорида айтиб ўтганимиздек, Сассексларнинг Spotify билан шартномаси ҳам бекор қилинган.
Харажатлар
Гарри ва Меганнинг АҚШдаги асосий хариди — бу нуфузли Монтесито ҳудудидаги тўққиз хонали уй ҳисобланади. Герцог ва герцогиня кейинги 30 йил давомида ипотека тўловларини, шунингдек, мулк солиғи ва суғуртани қоплаш учун ойига қарийб 50 минг фунт стерлинг тўлаши керак, чунки улар 11 миллион фунт стерлинглик мазкур уйни сотиб олиш учун тахминан 7 миллион фунт стерлингга яқин ипотека кредити олган.
Виндзордаги Фрогмор коттежи энди жуфтликка тегишли эмас, лекин улар дастлаб харажатлари Британия солиқ тўловчилари томонидан қопланган коттежни таъмирлаб кетишга мажбур бўлганди.
Кўчмас мулкдан ташқари, Сассекслар хавфсизлик учун жуда кўп пул сарфлашади. Улар Буюк Британияда яшаб, Metropolitan полицияси томонидан қўриқланади, аммо бу хизматларнинг нархини ҳисоблаш жуда қийин. Опра шоусида Гаррининг сўзларига кўра, у ва Меганнинг Netflix ҳамда Spotify каби компаниялар билан йирик пул битимлари ҳеч қачон даромад олиш учун бўлмаган, аммо бу пул оила хавфсизлигини таъминлаш учун зарур эди: “Фикримча, менга энг кўп керак бўладиган нарса — оилам хавфсизлигини таъминлаш учун тўлашим зарур бўлган етарлича пулим бўлишидир”, — деб тан олади Гарри.
Изоҳ (0)